पेगासस झालं, आता हर्मिट! राजकीय नेते, कॉर्पोरेट, पत्रकार यांच्या मोबाइल हेरगिरीसाठी वापर!

मुक्तपीठ टीम

इस्रायली पेगासस स्पायवेअर प्रकरण अद्याप संपलेले नसताना आणखी एक नवीन मोबाइल फोन स्पायवेअर उघडकीस आलं आहे. ‘हर्मिट’असे या धोकादायक स्पायवेअरचे नाव आहे. हर्मिट या स्पायवेअरचा वापर जगभरातील काही देशांचे सरकार उच्च प्रोफाइल अधिकाऱ्यांची हेरगिरी करण्यासाठी करत असल्याचे पुढे आले आहे. राजकारणी, वरिष्ठ सरकारी अधिकारी, पत्रकार, मानवाधिकार कार्यकर्ते, शैक्षणिक संस्थांशी संबंधित लोक आणि व्यापारी या स्पायवेअरचे लक्ष्य आहेत.

या देशांमध्ये हर्मिट सक्रीय!

• लुकआउट थ्रेट लॅब नावाच्या या कंपनीच्या संशोझनानुसार, कझाकस्तानमध्ये प्रथमच या अभ्यासात त्याचा वापर झाल्याचे आढळून आले.
• कझाकस्तानमध्ये सरकारी धोरणांविरोधात लोक रस्त्यावर उतरले.
• हे आंदोलन कझाक सरकारने जबरदस्तीने दडपले होते.
• तेव्हापासून, कझाक सरकार लोकांची हेरगिरी करण्यासाठी हर्मिट स्पायवेअर वापरत आहे.
• याशिवाय हे अँड्रॉइड आधारित सॉफ्टवेअर सीरिया आणि इटलीमधील युजर्सच्या फोनमध्येही दिसले.

असे करते कार्य

• लुकआउट कंपनीने आपल्या अहवालात म्हटले आहे की हर्मिट स्पायवेअर हे मॉड्युलर स्पायवेअर आहे, जे डाउनलोड केल्यानंतर आपले काम सुरू करते.
• हे सॉफ्टवेअर एसएमएसद्वारे मोबाईलमध्ये इन्स्टॉल केले जाते. हे फिशिंग हल्ल्यासारखे आहे.
• हे हर्मिट डाऊनलोड झाल्यानंतर लगेच काम करण्यास सुरवात करते.
• हे Android फोनवर इंस्टॉल झाले की फोनमधील सर्व अॅक्टीव्हिटी वारंवार तपासत राहते.
• हे ऑडिओ रेकॉर्ड करू शकते, कॉल करू शकते आणि ते पुनर्निर्देशित करू शकते.
• हे कॉल लॉग, डिव्हाइस लोकेशन आणि एसएमएस डेटा चोरू शकते.
• त्याची iOS आवृत्तीही समोर आली आहे. म्हणजेच आयफोनमध्येही घुसू शकतो, पण त्याचे नमुने सापडलेले नाहीत.

इटालियन कंपनीच्या हर्मिट स्पायवेअरचे परदेशी ग्राहक

• हर्मिट स्पायवेअर इटलीमधील आरसीएस लॅब आणि ताईकेलाब एसआरएल यांनी विकसित केले आहे, असे संशोधकाने त्याच्या ब्लॉगमध्ये म्हटले आहे.
• इटालियन सरकारने २०१९ मध्ये भ्रष्टाचारविरोधी मोहिमेसाठी याचा वापर केला.
• RCS लॅब जवळपास ३० वर्षांपासून सक्रिय आहे आणि पेगासस बनवणारी इस्रायली फर्म NSO ग्रुप आणि फिनफिशरचा निर्माता गामा ग्रुप यांच्या कार्यक्षेत्रातच कार्यरत आहे.
• RCS लॅबचे पाकिस्तान, चिली, मंगोलिया, बांगलादेश, व्हिएतनाम, म्यानमार आणि तुर्कमेनिस्तानच्या लष्करी आणि गुप्तचर संस्थांशी संबंध आहेत.