शिवसेनेचा गेम राष्ट्रवादीनेच केला!

मुक्तपीठ टीम

राज्यसभा निवडणुकीत शिवसेना उमेदवार संजय पवार याचा पराभव करत भाजपाचे धनंजय महाडीक विजयी झाले. राज्यसभा निकालानंतर सत्ताधारी आणि विरोधकांच्या पतिक्रिया येत आहेत. केंद्रीय तपास यंत्रणेच्या दबावामुळे भाजपाचा विजय झाल्याचा आरोप शिवसेना खासदार संजय राऊत यांनी केले. दरम्यान भाजपा खासदार डॉ. सुजय विखे यांनी शिवसेनेचा गेम राष्ट्रवादी काँग्रेसनेच केल्याचा गंभीर आरोप केला आहे.

राष्ट्रवादी काँग्रेस हा खेळ करणारा पक्ष!

गेल्या दोन वर्षांपासून राष्ट्रवादीकडून शिवसेनेला संपवण्याचा प्रयत्न सुरु आहे.
राज्यसभेच्या निकालाबद्दल अपक्षांना दोष देण्यापेक्षा शिवसेनेने काँग्रेस राष्ट्रवादीच्या मताधिक्याकडे पहावे.
या निकालावरून राष्ट्रवादी शिवसेनेला संपवणार हे माझं भाकीत खरं ठरताना दिसत आहे.
काँग्रेस आणि राष्ट्रवादी महाविकास आघाडीत सुखी आहेत.
मात्र, सामान्य शिवसैनिकांसह आमदार खासदार दुःखी आहेत.
येणाऱ्या विधान परिषदेतही शिवसेनेची नामुष्की होणार आहे.
मुख्यमंत्र्यांनी हे सगळं षडयंत्र ओळखावे.
माझ्या आजोबांपासून शिवसेनेशी आमचे संबंध आहेत.
त्यामुळे मला शिवसेनेबद्दल सहानुभूती आहे.
त्यांनी राष्ट्रवादी काँग्रेस पासून सावध रहाण्याची गरज असून राष्ट्रवादी काँग्रेस हा खेळ करणारा पक्ष आहे.

या पराभवाचा जाब शिवसेनेने राष्ट्रवादीला विचारण्याची गरज!

पराभव होतो तेव्हा अनेक कारणं शोधली जातात.
त्यामुळे त्यांनी एवढ्या लांब जाण्यापेक्षा राष्ट्रवादीशी चर्चा करायला हवी.
त्यांनी असे का केले याचा जाब विचारायला हवा.
ते दिलखुलासपणे सांगतील त्यांनी हे का केले.
पवार साहेबांनी देखील निकाल धक्कादायक नसल्याची प्रतिक्रीया दिली आहे.
म्हणजे त्यांना हे अपेक्षित होतं याचा विचार शिवसेनेने करणे गरजेचे असल्याचे सुजय विखे यांनी म्हटले.