पुस्तक खरेदीत पत्रकारांचा व्यत्यय आणि राज ठाकरेंचा वैताग…”जगू द्याल की नाही?”

मुक्तपीठ टीम

मनसे आणि मनसे अध्यक्ष राज ठाकरे म्हटलं की तिथे पत्रकार नाही असं कधीच घडलं नाही. पत्रकार आणि राज ठाकरे यांचं समीकरणचं वेगळं आहे. मात्र याच पत्रकारांवर राज ठाकरे यांनी संताप व्यक्त केला आहे. राज ठाकरे पुणे दौऱ्यावर आहेत. दरम्यान दौऱ्याच्या पहिल्याच दिवशी जेव्हा राज ठाकरे पुस्तक खरेदी करण्यासाठी पुण्यातील बाजीराव रस्त्यावरील ‘अक्षरधारा’ या पुस्तकाच्या दुकानात आले होते, तेव्हा पत्रकारांना पाहून त्यांनी ‘काही जगू द्याल की नाही?’ असं म्हणत संताप व्यक्त केला. आता हा व्हिडीओ सोशल मीडियावर व्हायरल होताना दिसतो आहे.

राज ठाकरे का वैतागले?

• राज ठाकरे दोन दिवसीय पुणे दौऱ्यावर आहेत.
• रात्री ८ वाजण्याच्या सुमारास राज ठाकरे बाजीराव रस्त्यावरील अक्षरधारा बुक गॅलरीत पुस्तक खरेदी करण्यासाठी पोहोचले.
• दरम्यान, याठिकाणी राज ठाकरे येणार म्हणून पत्रकारांनी गर्दी केली होती.
• गाडीतून उतरल्यानंतर राज ठाकरे पत्रकारांवर संतापले.
• कॅमेरामन आणि पत्रकारांजवळ येऊन‘ऐ लाईट बंद करा रे, काही जगू द्याल की नाही’ अशा शब्दांत खडसावले.
  त्यामुळे पत्रकारांमध्ये एकच गोंधळ उडाला.

मुक्तपीठ भूमिका:

माध्यम नको तर कळवतं कोण?

• राज ठाकरे यांना त्यांच्या पुस्तक खरेदीत पत्रकारांमुळे व्यत्यय आला वाटणं स्वाभाविक आहे. त्यातही माध्यमांच्या कॅमेऱ्यांसमोरच सर्व काही, हे खुपणारंही. त्यामुळे त्यांनी वैतागून केलेली विचारणा, “ये लाईट बंद करा रे, काही जगू द्याल की नाही” काही चुकीची म्हणता येणार नाही.
• प्रश्न एवढाच की, जर माध्यमं नको असतील तर अशा खासगी भेटींची माहिती पत्रकारांना देतं कोण? ही माहिती राजकीय नेत्यांचे स्थानिक पदाधिकारी, सोबत असलेली जवळची माणसंच पुरवतात किंवा काही वेळा तर आपल्या जीवनातील ही मानवीय बाजू लोकांसमोर यावी, यासाठी नेतेही तशी व्यवस्था करतात.