शेतकऱ्यांना दिवसा वीजेसाठी स्वाभिमानीकडून चक्काजाम आंदोलन

मुक्तपीठ टीम

शेतीला दिवसा वीज मिळावी आणि वीज तोडणी थांबवावी, या मागण्यांसाठी राज्यात आज स्वाभिमानी शेतकरी संघटनेकडून चक्काजाम आंदोलन करण्यात आले. आंदोलकांनी कोल्हापूर-रत्नागिरी राज्यमार्ग रोखल्याने वाहतूक कोंडी झाली होती. शेतीला दिवसा वीज मिळावी आणि वीज तोडणी थांबवावी, या मागण्यांसाठी हे आंदोलन करण्यात आले.

जोपर्यंत निर्णय होत नाही तोपर्यंत आंदोलन सुरूच राहणार…

या चक्काजाम आंदोलनाला कार्यकर्त्यांनी घोषणा देत परिसर दणाणून सोडला.
महावितरणचं करायचं काय, खाली डोकं वर पाय, राजू शेट्टी तुम आगे बढो, हम तुम्हारे साथ हे, अशी घोषणाबाजी करण्यात आली.
यावेळी राजू शेट्टी यांचे सुपुत्रही या आंदोलनात सहभागी झाले होते.
आंदोलकांना पोलिसांनी ताब्यात घेतलं आहे.
जिल्ह्यातील कुरुंदवाड आणि शिरोळ तालुक्यातील उदगाव टोलनाक्याजवळही स्वाभिमानी शेतकरी संघटनेच्या कार्यकर्त्यांनी रास्ता रोको करून महावितरण व सरकारचा निषेध केला आहे.
जोपर्यंत निर्णय होत नाही तोपर्यंत आंदोलन सुरूच ठेवण्याचा निर्णय यावेळी घेण्यात आला आहे.

यासाठी स्वाभिमानी शेतकऱ्यांचं आंदोलन

शेतीला दिवसा वीज मिळावी या मुख्य मागणीसाठी मागील काही दिवसांपासून कोल्हापूरच्या महावितरणच्या कार्यालयासमोर धरणं आंदोलन करणारी स्वाभिमानी शेतकरी संघटना आता आक्रमक झाली आहे.
शेतीला दिवसा दहा तास वीज देण्याचा निर्णय झाला नाही, तर ४ मार्चपासून आंदोलन तीव्र करणार असल्याचा इशारा माजी खासदार राजू शेट्टी यांनी दिला होता.
यापूर्वी दोन मंत्री, दोन आमदारांनी आंदोलनाला भेट दिली होती. मात्र, शासनस्तरावर कोणताही निर्णय झाला नाही.
यापुढे मंत्री, आमदारांच्या सार्वजनिक कार्यक्रमात अडथळा आणणार, असाही इशाराही राजू शेट्टी यांनी यापूर्वी दिला होता.
ऊर्जामंत्र्यांनी आंदोलनातील नुकसानीची जबाबदारी माझ्यावर टाकून बघावी, विजेच्या वाढीव दरांची जबाबदारी त्यांच्यावर टाकेन.