नव्या वर्षात होणार मध्य रेल्वेच्या प्रवाशांसाठी आरामदायी प्रवास

मुक्तपीठ टीम

मध्य रेल्वेच्या प्रवशांसाठी एक आनंदाची बातमी आहे. मध्य रेल्वेदरम्यान प्रवास करताना येणारा अडथळा हा कायमस्वरूपी दूर होणार आहे. आता नव्या वर्षात लोकल प्रवास अधिक सुखकर करण्यासाठी ठाणे-दिवादरम्यान मेल-एक्स्प्रेस आणि लोकलसाठी स्वतंत्र मार्ग खुला करण्यात येणार आहे. हा मार्ग उपलब्ध झाल्यानंतर ८०-१०० लोकलफेऱ्या वाढवण्याचा पर्याय उपलब्ध होईल.

असा असेल प्रकल्प

• नवीन रेल्वे मार्गाला जुन्या रेल्वे रुळांची जोडणी देण्याची आणि यार्ड जोडणीची कामे सध्या बाकी आहेत.
• ठाणे आणि दिवा या दोन्ही ठिकाणी ही जोडणी द्यावी लागणार आहे.
• तांत्रिक काम अचूक पद्धतीने पूर्ण व्हावे, यासाठी अनुभवी ज्येष्ठ अधिकाऱ्यांची जादा कुमक तैनात करण्यात आली आहे.
• ‘एमआरव्हीसीकडून प्रकल्पाचे काम पूर्ण करण्यात येईल.
• मात्र, लोकलफेऱ्या किती वाढणार, त्या साध्या असतील की वातानुकूलित, यांचा निर्णय मध्य रेल्वेने घ्यायचा आहे, असे रेल्वे अधिकाऱ्यांनी सांगितले.
• जानेवारीत प्रकल्प पूर्ण झाल्यानंतर टप्प्याटप्याने लोकल फेऱ्या वाढविण्यात येणार आहेत.
• विनावातानुकूलित एका लोकलगाडीच्या साधारण १०-१२ फेऱ्या होतात.
• यामुळे एकाचवेळी फेऱ्या वाढवण्याऐवजी प्रवासी मागणी लक्षात घेऊन आवश्यक त्या ठिकाणी वाढीव लोकल चालविण्यात येतील.

प्रकल्पाचा घटनाक्रम

• २००८मध्ये हा प्रकल्प कागदावर मंजूर झाला.
• अतिक्रमण, खारफुटी, परवानगी या अडथळ्यांची शर्यत पार करत या प्रकल्पाचे काम आता जानेवारी २०२२मध्ये पूर्ण होणार आहे.
• २००८ मध्ये प्रकल्पखर्च १३० कोटी होता.
• प्रकल्प पूर्ण होईपर्यंत खर्चाने ५४० कोटीपर्यंत उड्डाण केले असल्याची माहिती एमआरव्हीसीने दिली.
• ठाणे-दिवादरम्यानची पाचवी आणि सहावी मार्गिका नववर्षाच्या मुहूर्तावर अर्थात जानेवारी २०२२ मध्ये खुला करण्यात येणार आहे.
• तांत्रिक कामे वगळता अन्य कामे पूर्ण झाल्याने प्रवाशांचा नव्या वर्षात सुखकर प्रवास शक्य होईल.