#शेतकरीआंदोलन दिल्लीतच नाही गल्लीतही कृषि कायद्यांविरोधात एल्गार!

मुक्तपीठ टीम

केंद्र सरकारचे कृषी कायदे रद्द करावे व शेतीमालाला आधार भावाचे कायदेशीर संरक्षण द्या या मागण्यांसाठी दिल्ली येथे सुरू असलेल्या शेतकरी आंदोलनाला आता राज्यातूनही वाढता पाठिंबा मिळत आहे. डाव्या पक्षांच्या पुढाकाराने नाशिकहून काढलेला शेतकरी वाहन मोर्चा आज आता आझादमैदानात आहे, दुपारी तो मोर्चा राजभवनावर धडकणार आहे. एकीकडे मुंबईत हे शेतकऱ्यांचे वादळ घोंघावत असतानाच पश्चिम महाराष्ट्रात स्वाभिमानी शेतकरी संघटनेचे नेते माजी खासदार राजू शेट्टींच्या नेतृत्वाखाली शेतकरी ट्रॅक्टर मोर्चा काढण्यात येत आहे. राष्ट्रवादी काँग्रेसचे नेते शरद पवार दुपारी आझाद मैदानात पोहचणार आहेत. काँग्रेस, शिवसेनेचे मंत्रीही मोर्चात सहभागी होणार आहेत.

उघड्या आभाळाखाली थंडीने कुडकुडत, मनात न्यायासाठी अंगार!

महाराष्ट्रात अखिल भारतीय किसान सभेच्या वतीने राज्यव्यापी वाहन मोर्चा काढण्यात आला आहे. नाशिक येथील गोल्फ क्लब मैदान येथून दोन दिवसांपूर्वी निघालेला मोर्चा काल रात्री मुंबईच्या आझादमैदानात पोहचला. रात्री शेतकऱ्यांनी घरून आणलेली भाकर खाऊन थंडीने कुडकुडत उघड्या आभाळाखाली रात्र काढली. पण सकाळी त्यांच्या घोषणांनी त्यांच्या मनातील न्यायासाठी लढण्याचा अंगार दाखवून दिला. आता शेतकऱ्यांच्या घोषणांनी दक्षिण मुंबईचा हा मुख्य परिसर दणाणून गेला आहे.

सर्व राजभवनांवर शेतकरी धडकणार

दिल्लीतील शेतकरी आंदोलन तीव्र करण्यासाठी संयुक्त किसान मोर्चाने देशभर २३ ते २६ जानेवारी या काळात सर्व राज्यांच्या राजधान्यांमध्ये राज्यपाल भवनांवर आंदोलन करण्याची हाक दिली आहे. मुंबई येथील आझाद मैदान येथे या आवाहनानुसार सुरू करण्यात येत असलेल्या महामुक्काम सत्याग्रहात सामील होण्यासाठी किसान सभेचा हा वाहन मार्च २४ जानेवारी रोजी दुपारी सामील होईल.

राज्यभरातील शंभरापेक्षा अधिक संघटनांच्या वतीने संयुक्त शेतकरी कामगार मोर्चाच्या झेंड्याखाली मुंबईतील हे महामुक्काम आंदोलन होत आहे. अखिल भारतीय किसान संघर्ष समन्वय समिती (महाराष्ट्र), कामगार संघटना संयुक्त कृती समिती (महाराष्ट्र), जन आंदोलनांची संघर्ष समिती (महाराष्ट्र), नेशन फॉर फार्मर्स (महाराष्ट्र) आणि हम भारत के लोग (महाराष्ट्र) या पाच संघटनांनी संयुक्त शेतकरी कामगार मोर्चा तयार केला आहे.

आता आझाद मैदान येथे सकाळी ११ वाजता सभा सुरु होईल. महाराष्ट्रातील सत्ताधारी महाविकास आघाडीतील सर्व पक्ष, डावे व लोकशाही पक्ष यांच्या प्रमुख नेत्यांसोबत अखिल भारतीय किसान सभेचे सरचिटणीस आणि दिल्लीतील आंदोलनाचे नेतृत्व करणाऱ्या संयुक्त किसान मोर्चाचे एक प्रमुख नेते माजी खासदार हनन मोल्ला या सभेस संबोधित करतील. सभेनंतर येथे जमलेले हजारो श्रमिक दुपारी २ वाजता राज भवनाकडे कूच करतील व प्रजासत्ताक दिनाच्या पूर्वसंध्येला आज राज्यपालांना आपल्या मागण्यांचे निवेदन सादर करतील.

प्रजासत्ताक दिनी तिरंग्याला सलामीनंतर सांगता

२६ जानेवारी या प्रजासत्ताक दिनी राष्ट्रीय ध्वजाचे वंदन आणि राष्ट्रगीत गाऊन तसेच शेतकरी-कामगारांचा लढा कोणत्याही परिस्थिती विजयी करण्याच्या निर्धारासह कार्यक्रमाची सांगता होईल.

शेतकरी आंदोलकांच्या मागण्या:

• शेतकरी विरोधी कृषी कायदे रद्द करा
• शेतीमालाला आधार भावाचे संरक्षण देणारा कायदा करा
• वीज विधेयक मागे घ्या
• कामगार संहितेमधील कामगार विरोधी बदल रद्द करा
• वनजमीन तथा देवस्थान, गायरान, आकारीपड, बेनामी व वरकस जमीन कसणारांच्या नावे करा
• महात्मा फुले कर्जमुक्ती योजनेची अंमलबजावणी पुन्हा सुरू करून सर्व शेतकऱ्यांना योजनेचा लाभ द्या