मुक्तपीठ टीम
चिऊ ताई, चिऊ ताई दार उघड, ही कविता आपण सर्वांनीच ऐकली आहे. या कवितेतही चिऊ ताईचं छोटंसं घर होतं. पण आता चिऊ ताईसाठी खरंखुरं घरटं बनवण्याची संधी आपल्या सर्वांना मिळणार आहे. कारण, पुण्याचा लोक बिरादरी मित्रमंडळ ट्रस्ट आणि तासगावच्या मंगलमूर्ती सेवाभावी संस्थेनं आता झूमवर घरटं बनवण्याचे क्लास सुरु केले आहेत. ही खरंतर एक मस्त दोन तासांची ‘घर तिथे घरटं’ अॅक्टिविटी आहे.
आपल्या लाडक्या चिऊ ताईसाठी घरटं बनवायला येथे शिकवण्यात येणार आहे. कुणालाही अगदी नाममात्र शुल्कात ऊन-पावसांतही टिकेल असं चिऊताईचं मजबूत घरटं बांधायला शिकता येणार आहे. मंगलमूर्ती संस्थेने गेल्या ५ वर्षांत हजारो चिमण्यांना आणि पक्षांना जीवदान दिले आहे. तसेच त्यांच्यासाठी घरटी बनवली आहेत. या छोट्या अॅक्टिविटीच्या वर्कशॉपसाठी फक्त ५० रूपये शुल्क द्यावे लागणार आहे. घरटे बनवण्यासाठी पुठ्ठा बॉक्स, सेलोटेप ब्राउन टेप प्लास्टिक पाईप, बॉक्स, कापूस, कात्री, गवत किंवा आंब्याच्या पेटीतील काड्या इत्यादी साहित्य आवश्यक आहे.
यंदाच्या पावसाळ्यातलं चिऊताईचं घरटं, किमान एक पावसाळा तरी नक्की टिकेल आणि वाहून न जाणारे असे बनवण्यास शिकवले जाईल. या ऑनलाइन उपक्रमात येथील निकम सर घरटं बनवायला शिकवणार आहेत त्याचबरोबर छानछान आणि सुंदर सुंदर गोष्टीही ते सांगणार आहेत. “घर तिथे घरटं” या कार्यशाळेची २ मेची बॅच संपूर्ण फुल झाली आहे. झूम सेशनच्या लिमिटमुळे त्यांना थांबावं लागत आहे. पुढील कार्यशाळा लवकरच भरवण्यात येईल. तुम्ही कार्यशाळेविषयी माहिती मिळवण्यासाठी लोकबिरादरीच्या ऐश्वर्या ७८७ ५५ ७१६७९ आणि शिल्पा ९६०७०५९२१३ यांच्याशी संपर्क साधा.
पाहा व्हिडीओ:
Subscribe
