ई-श्रम पोर्टलवर नोंदणी झालेले २६ कोटी मजुरांचं मासिक उत्पन्न १० हजाराखाली! ७४% एसटी, एससी, ओबीसी!!

मुक्तपीठ टीम

देशातील असंघटित क्षेत्रातील कामगारांच्या नोंदणीसाठी सरकारने ई-श्रम पोर्टल सुरु केले आहे. ई-श्रम पोर्टल श्रमिक वर्गाला उत्पन्नाचे वेगळे पर्यायही उपलब्ध करून देते. ई-श्रम पोर्टलवर आतापर्यंत २७.६९ कोटी असंघटित क्षेत्रातील कामगारांची नोंदणी झाली आहे. त्यापैकी ९४ टक्के म्हणजे जवळपास २६ कोटी कामगार दरमहा १० हजार रूपयांपेक्षाही कमी कमावतात. ई-श्रम पोर्टलच्या नवीनतम आकडेवारीवरून, ही माहिती समोर आली आहे. तसंच पोर्टलवर नोंदणीकृत कामगारांपैकी ७४ टक्के कामगार अनुसूचित जाती, अनुसूचित जमाती आणि इतर मागासवर्गीयांमधील आहेत.

या राज्यांमध्ये सर्वाधिक नोंदणी

नोंदणीच्या बाबतीत उत्तर प्रदेश, बिहार, पश्चिम बंगाल, मध्य प्रदेश आणि ओडिशा ही पाच राज्ये पुढे आहेत.
नोंदणीकृत कामगारांपैकी ५२.११ टक्के कामगारांचा मुख्य व्यवसाय हा शेती आहे.
९.९३ टक्के घरांमध्ये काम करतात तर ९.१३ टक्के बांधकाम क्षेत्रात काम करतात.

७४% एसटी, एससी, ओबीसी वर्गातील कामगार

४.३६ टक्के लोक १० हजार ते १५ हजार दरम्यान आहे.
पोर्टलवर नोंदणीकृत कामगारांपैकी ७४ टक्के कामगार हे समाजातील मागासलेल्या घटकातील आहेत.
त्यापैकी ४५.३२ टक्के ओबीसी, २०.९५ टक्के अनुसूचित जाती आणि ८.१७ टक्के अनुसूचित जमाती प्रवर्गातील आहेत.
सर्वसाधारण श्रेणीतील कामगारांची संख्या २५.५६ टक्के आहे.

२०२१ मध्ये मागास कामगारांची संख्या ७२.५८%

नोव्हेंबर २०२१ मध्ये, असंघटित क्षेत्रातील १० हजार रुपयांपेक्षा कमी दरमहा कमाई करणाऱ्या कामगारांची संख्या ९२.३७ टक्के होती.
त्यावेळी पोर्टलवर ८ कोटींहून अधिक कामगारांची नोंदणी झाली होती. पोर्टलवर नोंदणीकृत एससी, एसटी आणि ओबीसी प्रवर्गातील कामगारांची संख्या ७२.५८ टक्के होती.

ई-श्रम पोर्टलवर नोंदणी वाढल्याने समाजात मोठ्या प्रमाणात असमानता असल्याचे दिसत आहे. या पोर्टलवर असंघटित क्षेत्रातील सर्व कामगारांची नोंदणी करण्याचे लक्ष्य आहे. असंघटित क्षेत्रातील कामगारांची संख्या सुमारे ३८ कोटी आहे.

ई-श्रम पोर्टलचा हेतू काय आहे?

देशातील असंघटित क्षेत्रातील कामगारांचा एनडीयूडब्ल्यू तयार करणे हे ई-श्रम पोर्टलचे उद्दिष्ट आहे.
हे पोर्टल २६ ऑगस्ट २०२१ रोजी लाँच करण्यात आले.
या पोर्टलद्वारे देशातील असंघटित क्षेत्रातील कामगारांना कल्याणकारी योजनांचा लाभ मिळवून देण्याचा सरकारचा मानस आहे.

६१.७२ टक्के कामगार १८ ते ४० वयोगटातील कामगार

६१.७२ टक्के कामगार १८ ते ४० वयोगटातील असून २२.१२ टक्के कामगार ४० ते ५० वयोगटातील आहेत.
पोर्टलवर नोंदणीकृत १३.२३ टक्के कामगार ५० वर्षांपेक्षा जास्त वयाचे आहेत.
२.९३ टक्के लोक १६ ते १८ वर्षे वयोगटातील आहेत.
पोर्टलवर नोंदणीकृत कामगारांपैकी ५२.८१ टक्के महिला आणि ४७.१९ टक्के पुरुष आहेत.