मुक्तपीठ टीम
राज्यात नुकत्याच १०६ नगरपंचायत निवडणुकींचा निकाल जाहीर झाला. या निवडणुकीत महाविकास आघाडीला एकत्रित संख्याबळानुसार चांगले यश मिळाले आहे. या विजयानंतर पहिल्यांदाच महाविकास आघाडीच्या तिन्ही पक्षाकडून एकत्र पत्रक जारी करण्यात आले आहे. राष्ट्रवादी काँग्रेसचे प्रदेशाध्यक्ष जयंत पाटील, काँग्रेसचे प्रदेशाध्यक्ष नाना पटोले आणि शिवसेनेचे नेते सुभाष देसाई यांच्या सहीने हे एकत्रित पत्रक जारी करण्यात आले आहे. या पत्रकात आता नगराध्यक्षांच्या होणार्या निवडणुकीतही महाविकास आघाडीचाच नगराध्यक्ष व्हायला हवा. यासाठी आघाडीच्या सर्व सदस्यांनी स्थानिक पातळीवर प्रामाणिक प्रयत्न करावेत, असे आवाहन करण्यात आले आहे.
महाविकास आघाडीचं पत्रक जसं आहे तसं…
महाविकास आघाडी स्थापन होऊन २ वर्षे पूर्ण झाली आहेत. राज्याच्या हिताच्या व महाराष्ट्रातील सर्वसामान्य जनतेच्या उत्कर्षासाठी महाविकास आघाडीची स्थापना करण्यात आली. महाविकास आघाडीतील सर्व घटक पक्ष मिळून आज सुयोग्यरित्या महाराष्ट्रातील जनतेला समान विकास कार्यक्रम अंतर्गत सक्षमरित्या कार्य करीत आहेत.
महाविकास आघाडीच्या स्थापनेपासून आज आपण सर्वजण पहिल्यांदाच १०६ नगरपंचायतीच्या व भंडारा, गोंदिया जिल्हा परिषद तसेच १५ नगर पंचायत समित्या निवडणुकीला सामोरे गेलो. या निवडणुकीमध्ये महाविकास आघाडीला भरघोस यशजनतेने दिले. त्याबद्दल राज्यातील जनतेचे आभार.
नगरपंचायत निवडणुकीमध्ये महाविकास आघाडीला मिळालेले यश आपल्याला कायम ठेवायचे आहे व जनतेने दाखवलेला विश्वास हा पुन्हा त्यांना समान विकास कार्यक्रमानुसार विकास स्वरूपात पुन्हा द्यावयायचा असेल तर आपल्याला प्रत्येक नगरपंचायतीमध्ये आघाडीचा नगराध्यक्ष होणे देखील अत्यावश्यक आहे. तरी आपण सर्वांनी याकरिता स्थानिक पातळीवर प्रामाणिक प्रयत्न करावेत व महाविकास आघाडीतील सर्व घटक पक्षाच्या निवडून आलेल्या सदस्यांना विश्वासात घेऊन जास्तीत जास्त नगराध्यक्ष महाविकास आघाडीचे निवडून येतील याकरिता प्रयत्न करावेत.
नुकत्याच झालेल्या नगरपंचायत निवडणुकीत महाविकास आघाडीला भरघोस यश मिळाले. आघाडीतील निवडून आलेल्या सदस्यांना@NCPspeaks, @ShivSena, @INCMaharashtra कडून आवाहन करण्यात येते की, महाविकास आघाडीचे जास्तीत जास्त नगराध्यक्ष निवडून येतील यासाठी प्रयत्न करावेत. @Jayant_R_Patil @NANA_PATOLE pic.twitter.com/PpH8ZOztBl
— NCP (@NCPspeaks) January 30, 2022
Subscribe
