गुजरात किनाऱ्याजवळ पाकिस्तानी नौकेतून २८० कोटींचे हेरॉईन जप्त!

मुक्तपीठ टीम

अरबी समुद्रातून पाकिस्तानी बोट पकडण्यासाठी भारतीय तटरक्षक दल (ICG) आणि गुजरात एटीएसला गोळीबार करावा लागला. पाकिस्तानी बोटीवरील नऊ जणांकडून २८० कोटी रुपयांचे हेरॉईन जप्त करण्यात आले आहे. संरक्षण मंत्रालयाच्या प्रवक्त्याने सोमवारी ही माहिती दिली आहे. ‘अल हज’ या पाकिस्तानी बोटीला तटरक्षक दलाच्या गस्तीनौकांनी भारतीय पाण्यातून पकडले. पाकिस्तानी मासेमारी बोट वेगाने पळून जाण्याचा प्रयत्न करत होती. यावेळी भारतीय तटरक्षक दलाच्या बोटीने त्याचा पाठलाग केला. त्याला रोखण्यासाठी भारतीय संघाला गोळीबार करावा लागला. या कारवाईत बोटीचा एक क्रू मेंबर जखमी झाला तर इतर दोघे किरकोळ जखमी झाले आहेत. काही वेळातच या परिसरात असलेल्या अंकित या तटरक्षक दलाचे जहाज त्याला ओढण्यासाठी घटनास्थळी पाठवण्यात आले. पाकची बोट आज दुपारी ३ वाजता जाखू बंदरात पोहोचली.

ICG अधिकाऱ्यांनी सांगितले की, पाकिस्तानी बोट ‘अल हज’ नऊ जणांसह रविवारी रात्री उशिरा भारतीय पाण्यात घुसली होती. ती हेरॉईनची पाकिटे भारतीय हद्दीत फेकण्याचा प्रयत्न करत होती. ठोस गुप्तचर माहितीनंतर, गुजरात एटीएसच्या दोन अधिकाऱ्यांना तटरक्षक दलाच्या जहाजासह घटनास्थळी पाठवण्यात आले. दरम्यान, हे पाकीट फेकताना पाकिस्तानी बोट पकडण्यात आली.

गुजरातमध्ये यापूर्वीही पाकिस्तानी बोटीतून अमली पदार्थ जप्त करण्यात आले आहेत. गेल्या वर्षी डिसेंबरमध्ये गुजरातच्या किनारपट्टीवर ७७ किलो हेरॉईन जप्त करण्यात आले होते. बोटीच्या सहा क्रू मेंबर्सना भारतीय पाण्यातून अटक करण्यात आली.