मुक्तपीठ टीम
नार्कोटिक्स कंट्रोल ब्युरो (एनसीबी) च्या मुंबई युनिटचे झोनल डायरेक्टर समीर वानखेडे यांची बहीण यास्मिन वानखेडे यांनी बुधवारी नवाब मलिक यांच्या विरोधात राष्ट्रीय महिला आयोगाकडे धाव घेतली. यास्मिन यांनी सांगितले की, मलिक त्यांना ऑनलाइन धमक्या देत आहे. त्यांनी राष्ट्रीय महिला आयोगाकडे या प्रकरणी तक्रार नोंदवण्याची विनंती केली. आयोगाला लिहिलेल्या पत्रात यास्मिन म्हणाल्या की, अलीकडेच कॅबिनेट मंत्र्याने माझ्यावर अनेक खोटे आरोप केले आहेत.
यास्मिन म्हणाल्या, ‘माझ्या भावाच्या प्रामाणिक कर्तव्यात अडथळा आणण्यासाठी नवाब मलिक माझ्या कुटुंबावर आणि माझ्यावर खोटे आणि निराधार आरोप करत आहेत.’ त्या पुढे म्हणाल्या की, नवाब मलिक माझ्या सोशल मीडिया हँडलवरून बेकायदेशीरपणे फोटो घेऊन पोस्ट करत आहेत.
तत्पूर्वी, यास्मिन समीरच्या जन्म प्रमाणपत्राबद्दल म्हणाल्या होत्या की, ‘ते (नवाब मलिक) ब्युरोक्रेटचा जन्म दाखला पाहणारे कोण आहे? मुंबईत पोस्ट केलेल्या फोटोचे श्रेय त्यांच्या संशोधन पथकाने दुबईला दिले आहे. आम्हाला जीवे मारण्याच्या धमक्या येत आहेत. मला असे वाटते की मी देखील दररोज खोटे पुरावे सादर केले पाहिजेत.”
नवाब मलिक यांनी बुधवारी समीर वानखेडेंच्या पहिल्या लग्नाचा फोटो आणि निकाहनामा ट्विट करून समीर दाऊद वानखेडेचा शबाना कुरेशीसोबतचा पहिला निकाहनामा असे लिहिले. यापूर्वी नवाब मलिक यांनी वानखेडे यांच्यावर सरकारी नोकरी मिळवण्यासाठी बनावट जन्म प्रमाणपत्राचा वापर केल्याचा आरोप केला होता.
क्रूझ ड्रग प्रकरणी नवाब मलिक यांनी एनसीबीचे झोनल डायरेक्टर समीर वानखेडे यांच्यावर अनेक आरोप केले आहेत आणि त्यांच्या लग्न आणि कार्यालयावरही प्रश्न उपस्थित केले आहेत. कार्डेलिया क्रूझ जहाजावर एनसीबीच्या टीमने ड्रग पार्टीचा पर्दाफाश केला होता. ही क्रूझ गोव्याला जात होती. बॉलिवूड स्टार शाहरुख खानचा मुलगा आर्यन खान याच्यासह एकूण २० जणांना पोलिसांनी ड्रग्स प्रकरणी अटक केली होती, त्यापैकी फक्त दोघांनाच जामीन मिळाला आहे.
Subscribe
