शिंदे गटाच्या केसरकरांनी का केलं भाजपाला नेत्यांना आवरण्याचं आवाहन?

मुक्तपीठ टीम

दहा दिवसांच्या महाराष्ट्रातील सत्तेच्या महासंघर्षानंतर उद्धव ठाकरे यांनी बुधवारी रात्री आपल्या मुख्यमंत्री आणि आमदार पदाचा राजीनामा दिला. त्यांच्या राजीनाम्यानंतर महाविकास आघाडीचे सरकार कोसळलं आहे. उद्धव ठाकरे यांच्या राजीनाम्यानंतर भाजपाच्या गोट्यात जल्लोष दिसून आला. या जल्लोषावर शिवसेनेचे बंडखोर आमदार दीपक केसरकर यांनी आक्षेप घेतला आहे. भाजपाचा असा जल्लोष योग्य नसल्याचे केसरकर यांनी म्हटले आहे. आमचं बंड हे आमच्या नेत्याविरोधातील नाही. भाजपाने आमच्यासारखंच पथ्य पाळावं, असं आवाहन त्यांनी माध्यमांशी बोलताना केलं आहे.

दीपक केसरकरांनी भाजपाला केलेलं आवाहन…

शिवसेना हा विचार आहे. शिवसेना हा विचार हिंदुत्वाचा विचार आहे. मराठी माणसांचा विचार आहे. तो विचार टिकला पाहिजे. सरकार येतं सरकार जातात. विचार बदलत नाही. हा विचार तसाच राहतो. आणि तो विचार कसा टिकवायचा हा सुद्धा एक विचार मंथनाचा भाग आहे.

भाजपाने पथ्य पाळावं!

उद्धव साहेब कुठेतरी दुखावले जाऊ नये हा सुद्धा भाग आहे. उद्धव ठाकरे यांनी राजीनामा दिल्यानंतर भाजपाचे अनेक लोक बोलत होती. असं जेव्हा दहा-दहा जण एकावेळी बोलतात, तेव्हा एखादा मनुष्य जरी चुकीचा बोलला तरी त्याच्याकडून अपमान होऊ शकतो. शेवटी स्वाभिमान आहे. तो दुखावला जाऊ शकतो. म्हणून जशी शिंदे गटाकडून जी काळजी घेतली जाते तशीच ती भाजपाने ही घेतली पाहिजे, अशी माझी कळकळची विनंती आहे. कुणाचं मन दुखवायचं नसतं. आम्ही आमच्या नेत्यांशी केला ना संघर्ष. कशासाठी केला तत्वासाठी केला. मग ते पथ्य आम्ही जसं पाळतो तसं भाजपाने ही पाळलं पाहिजे. जसं की, एखादा आमदार, खासदार चुकीचा बोलत होता, तर संघर्षाच्यावेळी ते ठीक आहे. आता तुम्ही जर सत्तेवर येत असाल तर त्या लोकांना असं थांबवलं सुद्धा पाहिजे. ही काळाची गरज आहे असं मला वाटतं.

बोलण्यावर मर्यादा पाहिजे!

काल आम्ही टिव्हीवर जे बघितलं जे काही चालू होतं, ते योग्य नाही. परंतु मोठे नेते आहेत, त्यांनी बोलताना किंवा किती लोकांनी बोलावं याला सुद्धा मर्यादा असते ना. जो नेता ज्याला माहिती असेल आपल्याला काय बोलायचं आहे. शेवटी आपल्याला महाराष्ट्रामध्ये राहायचं आहे. सगळ्यांना बरोबर घेऊन आपल्याला महाराष्ट्र पुढे घेऊन जायचा आहे. त्यावरून आपण एक मर्यादा आणली पाहिजे. मर्यादा अशी आणली पाहिजे की, किती लोकं ठराविक बोलतील.आणि मग ते बोलताना त्यांच्या बोलण्यामध्ये संयम पाहिजे. त्यांनी ते पथ्य पाळलचं पाहिजे

आमचं बंड आमच्या नेत्याविरोधात नाही!

कालच्या भाजपाच्या जल्लोषामुळे दुखावले जाणार. कारण आम्ही आमच्या नेत्याच्याविरोधात बंड नाही केला. राष्ट्रवादी आणि काँग्रेसच्या विरोधात केलेला आहे. आणि त्यामध्ये त्यांना दुखावणारी कोणती वक्तव्य आली तर आमच्या लोकांना वाईट वाटणार ना. आणि त्यासाठी पथ्य पाळले गेले पाहिजे. फडणवीस हे मोठे नेते आमच्या संकटकाळात ते होते. पण कुठेतरी हे थांबलं पाहिजे. अशा प्रकारची वक्तव्य थांबली पाहिजे.

आमचं सत्तेसाठी केलेलं बंड नाही!

हे केवळ जर बंड असतं तर सहा सहा मंत्री यांच्यामध्ये सामील का होतात. यांच्याकडे मंत्री पदं होतीच ना. ती मंत्रीपद यांच्याकडे जर होती तर मग ते का आले? हा एक वेगळा भाग असतो आणि म्हणून केवळ याच्याकडे बंड म्हणून बघू नका. हे सत्तेसाठी केलेलं बंड नाही. हे विचारांसाठी केलेलं बंड आहे. आणि ते जर बंड असेल तर पक्षामध्ये काही तरी घडलं असेल म्हणून ते घडलं आहे. तो एक वेगळा विचार आहे. हा एक वैचारिक संघर्ष आहे.