मुक्तपीठ टीम
विश्वास बसणार नाही अशी एक धक्कादायक घटना घडली आहे. व्यवसायानं डॉक्टर आणि सिव्हिल इंजिनियर असणाऱ्या दोघांचे ठरलेलं लग्न मोडलं कारण म्हणे कुंकवाचा दर्जा चांगला नव्हता. किमान पोलिसांकडे दाखल तक्रारीत तरी वधूच्या घरच्यांनी तसंच म्हटलं आहे. या घटनेबद्दल सगळीकडे हळहळ व्यक्त केली जात आहे. दोघेही उच्चशिक्षित, तरीही या कुटुंबांमध्ये असं का आणि कसं बिघडलं? अशी चर्चा सुरु आहे.
हे लग्न दोघांच्या घरातल्यांच्या परवानगीने ठरविण्यात आले होते. त्यांची चांगली मैत्री झाली होती. सर्व काही सुरळीत सुरू होते.
२८ फेब्रुवारी रोजी वाडा येथे साखरपुडा समारंभ झाला. दोन दिवसांनी वराकडून वधूकडच्यांना बोलवून घेतले गेले.साखरपुड्यात वापरलेल्या कुंकवाचा दर्जा कमी असल्याने अपमान झाल्याचे इंजिनीअर नीरज पाटील म्हणजेच वराच्या आईने सांगितले. सारं काही चांगलं चाललेलं असताना अचानक हा धक्का बसल्यामुळे वधूच्या कुटुंबीयांनी वर, त्याचे पालक आणि त्यांचे काका यांच्याविरूद्ध तक्रार दाखल केली.
वराच्या काकाने आपल्या वसईला राहणाऱ्या इंजिनीअर पुतण्याचा प्रस्ताव वाड्याच्या डॉक्टर मुलीसाठी तिच्या वडिलांना दिला होता. त्यामुळे तेही आरोपी झाले.
वधूच्या घरच्यांनी आपल्या तक्रारीत म्हटले आहे की, “१ मार्च रोजी आम्ही वराच्या काकांना गप्पा मारण्यासाठी बोलावले आणि सोहळा कसा आहे ते विचारले. धक्कादायक म्हणजे, एक दिवसानंतर, वराने मुलीला बोलावून सांगितले की, तुमच्या आईने आणि तुम्ही, माझ्या आई-वडिलांचा अपमान केला आहात. आम्ही हे लग्न तोडत आहोत. आम्ही सर्वजण हादरलो होतो. ”
“माझ्या मुलीने नीरजला बर्याच वेळा फोन केला पण त्याने उत्तर दिले नाही. आम्ही त्यांना कॉल देखील केला आणि त्यांच्या घरी गेलो, परंतु आम्हाला आत येण्याचीही परवानगी दिली नाही. आम्हाला त्यांच्या इमारतीतून बाहेर काढण्यात आले.” असे वडिलांनी आपल्या तक्रारीत म्हटले आहे.
पोलीस उपनिरीक्षक रुपाली गुंडे यांनी सांगितले की, “फसवणूक आणि मानहानीसाठी ४२०, ४१७, ५०० आणि ३४ या कलमांखाली महिलेच्या तक्रारीच्या आधारे आम्ही गुन्हा नोंदविला आहे.
नीरजच्या कुटुंबीयांनी आम्हाला सांगितले की, या महिलेच्या पालकांनी साखरपुडा समारंभात कमी दर्जाचा कुंकू वापरला, ज्यामुळे त्यांच्या पाहुण्यांसमोर त्यांचा अपमान झाला. त्यांनी आम्हाला असेही सांगितले की, मुलीच्या पालकांनी त्यांना सांगितले असते तर त्यांनी चांगल्या प्रतीचे कुंकू आणले असते, ” अशी गुंडे यांनी माहिती दिली.
Subscribe
