मुक्तपीठ टीम
“एसटी कर्मचाऱ्यांनो तुम्ही आमचेच आहात, बाहेरचे नाहीत. गेल्या काही दिवसांपासून तुमच्या मागण्या मान्य करून तुम्हाला दिलासा द्यावा यासाठी, राज्य शासन मनापासून प्रयत्न करत आहे”, असं म्हणत मुख्यमंत्री उद्धव ठाकरे यांनी एसटी कर्मचाऱ्यांना कळकळीचं आवाहन केलं आहे. राज्य सरकारमध्ये एसटी महामंडळाचे विलिनीकरण करण्यात यावे या मागणीसाठी एसटी कर्मचाऱ्यांनी राज्यात संप पुकारला आहे. परिवहन मंत्री अनिल परब यांच्या ताठर भूमिकेमुळे संप मिटण्याऐवजी अधिकच चिघळताना दिसत असल्याने अखेर मुख्यमंत्री उद्धव ठाकरे पुढे आल्याचे मानले जाते. तसेच परिस्थितीचा फायदा घेणाऱ्या भाजपालाही “ही वेळ राजकारणाची नाही हे लक्षात घ्या” असे सुनावले आहे.
प्रवाशांना वेठीस धरणारे आंदोलन करू नका!
- उच्च न्यायालयासमोर देखील शासनाने आपला प्रश्न सोडविण्यासाठी काय काय पाऊले उचलत आहोत ते सांगितले असून न्यायालयाचे देखील समाधान झाले आहे.
- न्यायालयाच्या सूचनेप्रमाणे आपल्या मागण्यांसंदर्भात पुढील तोडगा काढण्यासाठी आपण विशेष समिती नेमून कामही सुरू केलं आहे.
- अशा परिस्थितीत माझी आपणास हात जोडून विनंती आहे की, कृपया राज्यातील गोरगरीब आणि सर्वसामान्य प्रवाशांना वेठीस धरणारे आंदोलन करू नका.
कृपया शासनाच्या प्रयत्नांना सहकार्य करा
- आधीच आपण सर्वच जण अजूनही कोरोनाशी लढतोय.
- दोन वर्षांपासून या विषाणूचा मुकाबला करत आपण कसाबसा मार्ग काढतोय.
- त्यामुळे कृपया शासनाच्या प्रयत्नांना सहकार्य करा अशी माझी पुन्हा एकदा नम्र विनंती आहे.
ही वेळ राजकारणाची नाही हे लक्षात घ्या
- राजकीय पक्षांनी देखील गरीब एसटी कर्मचाऱ्यांना चिथावणी देऊन, आंदोलनास भाग पाडून त्यांच्या संसारांच्या होळयांवर आपल्या राजकीय पोळ्या भाजू नका अशी माझी त्यांनाही कळकळीची विनंती आहे.
- ही वेळ राजकारणाची नाही हे लक्षात घ्या.
Subscribe
