महाराष्ट्रात पुन्हा संतापजनक घटना: तरुणीवर धावत्या बसमध्ये दोनवेळा बलात्कार

मुक्तपीठ टीम

राज्यात दिल्लीतील निर्भया प्रकरणासारखी एक संतापजनक घटना समोर आली आहे. नागपूरवरून पुण्याला येणाऱ्या एका तरुणीवर खासगी बसमध्ये दोन वेळा बलात्कार करण्यात आल्याची घटना घडली आहे. त्यानंतर या घटनेबद्दल वाच्यता केल्यास चालत्या बसमधून फेकून देण्याची धमकीही दिली.

६ जानेवारीला रात्री प्रवासादरम्यान ही घटना घडली. पीडित तरुणी नागपूरवरून पुण्याला जाण्यासाठी खासगी बसमधून प्रवास करत होती. बसमध्ये चढल्यानंतर तिला क्लिअरने मागच्या सीटवर बसण्यास भाग पाडले. बस सुरू झाल्यानंतर क्लिअनरने तिला चाकूचा धाक दाखवला आणि दोन वेळा तिच्यावर बलात्कार केला. त्यानंतर या घटनेबद्दल वाच्यता केल्यास चालत्या बसमधून फेकून देण्याची धमकीही दिली.

बस पुण्यात दाखल झाल्यानंतर तरुणीने पोलिसांत तक्रार दाखल केली. पुणे पोलिसांनी गुन्हा दाखल करून घेतला. खासगी बस वाशिम जिल्ह्यातील मालेगाव परिसरात असताना ही घटना घडलेली असल्यानं गुन्हा मालेगाव पोलिसांकडे वर्ग केला. या प्रकरणाची पोलीस चौकशी करत आहेत. त्याचबरोबर आरोपी क्लिनरला अटक करण्यासाठी पोलिसांचं एक पथक नागपूरला पाठवण्यात आलं आहे. दरम्यान, पीडित तरुणीला वैद्यकीय चाचणीनंतर घरी पाठवण्यात आलं आहे.

रत्नागिरीत ९० वर्षांच्या वृद्धेवर बलात्कार

रत्नागिरी जिल्ह्यातील दापोलीमधील एका ९० वर्षाच्या वृध्देवर घरामध्ये एकटी असताना बलात्कार केल्याची धक्कादायक घटना समोर आली. एक महिन्यानंतर पीडित वृध्द महिलेच्या सुनेने दापोली पोलिस ठाण्यात तक्रार दाखल केली आहे. या घटनेमुळे दापोली तालुक्यात संतापाची लाट उसळली आहे.

अडीच वर्षांच्या चिमुरडीची बलात्कारानंतर हत्या

३० डिसेंबरच्या रात्री रायगड जिल्ह्यातील पेण तालुक्यातील एका वाडीत माणुसकीला काळीमा फासणारी घटना घडली. आई-वडिलांच्या कुशीत झोपलेल्या अडीच वर्षांच्या चिमुकलीला वासनांध नराधमाने उचलून नेले तिच्यावर अत्याचार करुन तिची दुर्दैवी हत्या केली. आपल्या कुशीत झोपलेली चिमुकली न दिसल्याने तिची आई कासाविस झाली. तिच्या वडिलांना देखिल उठवले, भल्या पहाटे शोध सुरू झाला. ३०/३५ घरे असलेली आदिवासी वाडी जागी झाली शोधाशोध सुरू झाली. पण ती चिमुकली वाडीत सापडली नाही. मात्र काही वेळाने तिचा मृतदेह वाडी परिसरात टाकून हा नराधम फरार झाला.