कोरोनाग्रस्त कर्मचाऱ्याचा मृत्यू झाल्यास कुटुंबियांची जबाबदारी टाटांची!

मुक्तपीठ टीम

देशाच्या प्रगतीमध्ये मोलाचा वाटा असलेल्या तसंच देशवासियांसाठी सदैव तत्पर असणाऱ्या टाटा ग्रुपचं नाव सन्मानाने घेतलं जातं. कोरोनाच्या या कठीण काळातही टाटा ग्रुपने बजावलेली भूमिका ही मोलाची आहे. अशातच टाटा स्टीलने त्यांचे कर्मचारी आणि कुटुबियांसाठी आखणी एक महत्वपूर्ण निर्णय घेतला आहे. टाटा स्टिलच्या कर्मचाऱ्याचा कोरोनामुळे मृत्यू झाल्यास त्याच्या वारसाला कर्मचाऱ्याच्या ६० वर्षवयापर्यंत म्हणजेच निवृत्तीपर्यंतचं संपूर्ण वेतन दिलं जाईल. तसंच कर्मचाऱ्याच्या मुलांचा शिक्षणाचा खर्चही कंपनीद्वारे केला जाईल. कुटुबियांची आरोग्य सेवा आणि निवासाच्या सुविधेची जबाबदारीही कंपनीची असेल.

#TataSteel has taken the path of #AgilityWithCare by extending social security schemes to the family members of the employees affected by #COVID19. While we do our bit, we urge everyone to help others around them in any capacity possible to get through these tough times. pic.twitter.com/AK3TDHyf0H

— Tata Steel (@TataSteelLtd) May 23, 2021

पदवीपर्यंतचा संपूर्ण खर्च उचलणार

फ्रंटलाईन कर्मचाऱ्याचा ड्युटीवर असताना मृत्यू झाल्यास त्यांच्या मुलांचा देशभरात कुठेही पदवीपर्यंतचा शिक्षणाचा खर्च कंपनीद्वारे केला जाईल. आतापर्यंत फक्त केंद्र सरकारच्या कर्मचाऱ्यांच्या मृत्यूनंतर त्यांच्या वारसांना पेन्शनसारख्या सुविधा मिळत आहेत. मात्र खासगी क्षेत्रातल्या कर्मचाऱ्यांबाबत असा निर्णय आतापर्यंत झालेला नाही. त्यात कोरोना काळात टाटा स्टिलने घेतलेल्या या निर्णयाचं सर्वत्र कौतुक होत आहे.