शिवसेना वर्धापनदिनी सामनानं भाजपासह अजित पवारांनाही समजवला शिवसेना धर्म?

मुक्तपीठ टीम

शिवसेनेचा आज ५५वा वर्धापन दिन आहे. दर वर्षी पाऊस कोसळत असला तरीही जल्लोशात साजरा होणारा हा दिवस गेल्या वर्षापासून कोरोना संकटामुळे साधेपणानं साजरा केला जात आहे. आजही शिवसेना पक्षप्रमुख आणि महाराष्ट्राचे मुख्यमंत्री उद्धव ठाकरे सर्व शिवसैनिकांशी व्हिडीओ कॉन्फरन्सिंगद्वारे संवाद साधणार आहेत. यावेळी शिवसेनेचे अनेक महत्त्वाचे नेते, उपनेते, जिल्हाप्रमुख, इतर पदाधिकारी हेही जोडलेले असतील. राज्याभरातही गेल्या वर्षाप्रमाणेच यंदाही शिवसेनेचा वर्धापन दिन साधेपणाने आणि सामाजिक उपक्रम राबवून साजरा केला जात आहे. त्याचवेळी आजची सकाळ ही शिवसेनेच्या दैनिक सामनामधील डरकाळीनं झाली.

“महाराष्ट्रात आज शिवसेनेचा मुख्यमंत्री आहे. शिवसेनेची सत्ता आहे, पण सत्तेचा ऊतमात ना शिवसेनेच्या सत्ताधाऱ्यांना चढला, ना आमच्या लाखो कडवट शिवसैनिकांना. पण कुणी विनाकारण अंगावर येऊन डिवचण्याचा प्रयत्न केलाच तर ‘हर हर महादेव’चा गजर करीत जिथल्या तिथे हिशेब करायला शिवसैनिक मागेपुढे पाहत नाहीत. शिवसेना ही अशी धोपटमार्गी आणि रोखठोक असल्याने जनतेच्या दिलावर ती ५५ वर्षे राज्य करीत आहे. शिवसेना हीरक महोत्सव, अमृत महोत्सव, शतक महोत्सवही साजरा करीलच करील. शिवसेनेची घोडदौड सुरूच राहील.” शुक्रवारी उपमुख्यमंत्री अजित पवार यांनी शिवसेनेला सत्ताधारी पक्षांच्या जबाबदारीची जाणीव करून देणारा जाहीर सल्ला दिला होता. त्यामुळे दैनिक सामनामधून सांगण्यात आलेला शिवसेना धर्म हा भाजपाप्रमाणेच त्यांच्यासाठीही असण्याची शक्यता आहे.

उपमुख्यमंत्री अजित पवार यांनी शिवसेनेला सत्ताधर्माची जाणीव करून दिली होती!

मुंबईत शिवसैनिक आणि भाजपा कार्यकर्त्यांमधील रस्त्यावरील राडा चांगलाच गाजला. त्यावर भाजपाने शिवसेनेवर जोरदार टीका केली. त्या टीकेला उत्तर देताना शिवसेना नेते संजय राऊत यांनी “होय, शिवसेना गुंडगिरी करते, आम्ही सर्टिफाईड गुंड”, असे म्हटले होते. त्यांच्या या वक्तव्यावर राज्याचे उपमुख्यमंत्री अजित पवार यांनी प्रतिक्रिया देताना शिवसेनाला सत्ताधारी पक्षाच्या जबाबदारीची जाणीव करून दिली होती.

अजित पवार काय म्हणाले होते?

कोणी काहीही बोलतं. कोणताही पक्ष स्वतःला गुंड म्हणून घेणार नाही.
आज राज्याचे प्रमुख शिवसेनेचे नेते आहेत.
कायदा सुव्यवस्था व्यवस्थित ठेवणं, कायद्याने राज्य चालवणं, नियमाने काम करणं, सर्व सहकाऱ्यांना सोबत घेणं प्रत्येकाची जबाबदारी आहे.
मुख्यमंत्री त्यापद्धतीने काम करत आहेत.

आजच्या सामना अग्रलेखात काय आहे?

शिवसेनेचा ५५ वा वर्धापन दिन आज साजरा होत आहे.
शिवसेनेचा वर्धापनदिन म्हणजे उत्साह , बुलंद गर्जना आणि प्रचंड गर्दी असा एकंदरीत थाटमाट असतो .
पण ‘ कोरोना ‘ महामारीने या सगळयांवर सलग दुसऱ्या वर्षीही पाणी ओतले आहे.
संपूर्ण देशाचीच स्थिती कोरोनामुळे गंभीर , तितकीच नाजुक बनली आहे . जीवनातल्या प्रत्येक क्षेत्रात आज फक्त निराशा किंवा वैफल्यच दिसत आहे . उद्योग क्षेत्राला फटका बसल्यामुळे लोकांनी मोठया प्रमाणात रोजगार गमावला आहे .
नोकऱ्याच गेल्याने त्याचा परिणाम शेवटी कष्टकऱ्यांच्या ‘ चुली’वर झाला . लोकांच्या चुली विझताना दिसत आहेत .
शिवसेनेने स्थापनेपासून लोकांच्या चुली पेटविण्याचा महायज्ञच आरंभला होता . शिवसेनेची स्थापनाच मुळी मराठी माणसाला महाराष्ट्राच्या राजधानीत हक्काची रोजीरोटी मिळावी , त्याला सन्मानाने जगता यावे यासाठीच झाली .
गेल्या दीड वर्षात लोकांनी गमावलेल्या नोकऱ्या हाच चिंतेचा आणि संकटाचा विषय बनला आहे .

देशाची प्रचंड मानहानी, पण या बदनामीच्या चक्रातून महाराष्ट्र लांब राहिला!

देशाचा व राज्यांचा खजिना फक्त कोरोनाशी लढण्यातच खर्ची पडला आहे . महाराष्ट्राने अनेक संकटे छाताडावर घेतली .
अनेक लढाया पचवल्या . राजकीय , सामाजिक लढयांत असंख्य बलिदानेही दिली , पण कोरोनाची पहिली लाट , मग दुसरी लाट , आता म्हणे तिसरी लाटही दारावर धडका देत आहे .
या लाटांनी आम्ही सगळ्यांनीच आपले आप्तस्वकीय , मित्रपरिवारांतले जवळचे लोक गमावले .
त्या सगळया संकटांवर आणि मृत्यूच्या तांडवावर महाराष्ट्राने जितक्या लवकर नियंत्रण मिळवले तेवढे ना केंद्राला जमले , ना इतर राज्यांना करता आले . गंगेत तरंगणारी प्रेते , गुजरातेत स्मशानाबाहेरील अॅम्ब्युलन्सच्या रांगा , सामुदायिक चिता यांचे फोटो जगभरात गेले .
देशाची प्रचंड मानहानी झाली . पण या बदनामीच्या चक्रातून महाराष्ट्र लांब राहिला .
तो फक्त महाराष्ट्रात शिवसेनेचा मुख्यमंत्री दमदारपणे कर्तव्य बजावत असल्यामुळेच .

गावागावात मदतीचा हात करणे गरजेचे!

आज देशाची घडी अशी आहे की , ती विस्कटली आहे की सुरळीत आहे यावर चर्चा करीत बसण्यापेक्षा गावागावांत लोकांना मदतीचा हात पुढे करणे गरजेचे आहे . शिवसेना या संकटकाळात आपल्या सेवाधर्माला जागते आहे .
८० टक्के समाजकारण व २० टक्के राजकारण या शिवसेनाप्रमुखांनी दिलेल्या मंत्राला जागत शिवसैनिकांनी खासगी रीतीने कोविड सेवा केंद्रे उभी केली . आरोग्य आणि रक्तदान शिबिरे घेतली .
गोरगरीबांच्या चुली बंद पडल्या तेथे मोफत अन्नधान्य पुरवठा करून महाराष्ट्र धर्माचे नाव राखले .
आजचा काळ असा आहे की , राजकारण , मतभेद चुलीत टाकून महाराष्ट्रासाठी सगळयांनी एकत्र येण्याचीच गरज आहे .
राज्यात प्रश्न अनेक आहेत . सगळय़ांत मोठा प्रश्न मराठा आरक्षणाचा आहे . सकल मराठा समाजास आरक्षण मिळावे म्हणून कोल्हापूरच्छी छत्रपती शाहू महाराजांसह , युवराज संभाजी राजे , छत्रपती उदयनराजेही मैदानात उतरले आहेत.
त्यापाठोपाठ धनगर , ओबीसी बांधवांनीही आरक्षणासाठी शडू ठोकलेच आहेत .
देशाची अर्थव्यवस्था कोसळत आहे .
देशाचे राजकीय चित्र आज अधिकाधिक स्पष्ट होत आहे की , अधिकाधिक गोंधळाचे आणि गुंतागुंतीचे बनत आहे ?

महाराष्ट्राच्या सामाजिक एकतेस शिवसेना कदापि तडे जाऊ देणार नाही

अर्थात कोणी कितीही गोंधळ आणि गुंतागुंत केली तरी महाराष्ट्राच्या सामाजिक एकतेस शिवसेना कदापि तडे जाऊ देणार नाही .
शिवसेना स्थापन करतानाच शिवतीर्थावरील पहिल्याच विराट सभेत शिवसेनाप्रमुखांनी एक मंत्र दिला , तोच महाराष्ट्राचा भक्कम पाया आहे.
शिवसेनाप्रमुख म्हणाले होते , “ मराठा – मराठेतर , शहाण्णव कुळी – ब्याण्णव कुळी , घाटी – कोकणी , ब्राह्मण – ब्राह्मणेतर , स्पृश्य – अस्पृश्य हे वाद गाडून मराठी माणसांची भक्कम एकजूट उभारू ! ”
या एकजुटीच्या वज्रमुठीतच शिवसेनेच्या ५५ वर्षांचे सार सामावलेले आहे . शिवसेनेचे मराठीपण जसे तळपणाऱ्या तेजासारखे आहे तसेच हिंदुत्वाचे कवचही बुलंद आहे .
शिवसेनेने आपले रंग सरडयासारखे बदलले नाहीत .
कष्टकरी , शेतकरी , नोकरदारवर्गाने शिवसेनेला भरभरून पाठबळ दिले ते याच सचोटीच्या राजकारणामुळे .