राज ठाकरे शरद पवारांना भेटणार!

मुक्तपीठ टीम

महाराष्ट्र नवनिर्माण सेनेचे पदाधिकारी जमील शेख यांच्या हत्येप्रकरणात ठाण्यातील नगरसेवक नजीब मुल्ला यांचं नाव आलं आहे. नजीब मुल्ला हे राष्ट्रवादीचे नगरसेवक आहेत. पोलिसांनी केलेल्या तपासातून ही माहिती समोर आली. सत्ताधारी पक्षाचे लोकच दिवसाढवळ्या लोकांना मारत असतील तर हे बरोबर नाही. या प्रकरणात सरकार काय करतेय ते पाहणारच आहे. नाही तर दुसऱ्यांचेही हात बांधलेले नाहीत. खुनाला उत्तर खुनाने देणं हे चित्रं महाराष्ट्रासाठी योग्य राहणार नाही, असा इशारा मनसेचे अध्यक्ष राज ठाकरे यांनी दिला. तसेच राष्ट्रवादीचे अध्यक्ष शरद पवार यांचीही भेट घेत नजीब मुल्लावर कारवाई करण्याची मागणी करणार असल्याचे राज ठाकरे यांनी सांगितले.

राज ठाकरे यांनी कृष्णकुंज निवासस्थानी पत्रकार परिषद घेतली. यावेळी त्यांनी “माझ्या पक्षातील सहकारी जमील शेख यांची हत्या झाली. या हत्याप्रकरणाचा पोलिसांकडून उत्तर प्रदेशपर्यंत तपास करण्यात आला. यावेळी काही आरोपींना अटक करण्यात आली. आरोपींनी कबुली जबाब दिला असून, यात राष्ट्रवादीचे नगरसेवक नजीब मुल्लांचं नाव आलं आहे. उत्तर प्रदेश पोलिसांची प्रेसनोट आहे. त्यामध्ये नजीम मुल्लांचं नाव आहे. नजीब मुल्ला यांनीच जमील शेख यांची हत्या करण्याची सुपारी दिली होती, असं या प्रेसनोटमध्ये म्हटलेलं आहे. सत्ताधारी पक्षाचे लोक दिवसाढवळ्या लोकांना मारत आहेत, असा इशारा दिला. याच नजीम मुल्लांचं नाव सूरज परमार बिल्डर आत्महत्या प्रकरणात आलं होतं. ती केसही रफादफा झाली. आता पुन्हा नाव आलं आहे. आता राज्य सरकार काय करतंय हे पाहतोय,”असं राज ठाकरे म्हणाले.

दुसऱ्यांचेही हात बांधलेले नाहीत-राज ठाकरे

या प्रकरणी शरद पवार यांची भेट घेणार आहे. अशी मंडळी त्यांना सांभाळायची असतील, तर दुसऱ्यांचे हातही बांधलेले नसतात. खुनाचे उत्तर खुनाने अशा गोष्टी महाराष्ट्रात सुरु झाल्या, तर हे चित्र चांगलं दिसणार नाही. नजीब मुल्ला याच्यावर कारवाई आणि शिक्षा होणं आवश्यक आहे, त्यासाठी शरद पवारांची भेट घेणार आहे.