मुंबईत कोरोना वाढतोय, कोरोना संसर्गानं राज ठाकरेंची शस्त्रक्रियाही पुढे ढकलली!

मुक्तपीठ टीम

मुंबईत कोरोना पुन्हा फैलावतोय. मंगळवारी एका दिवसात कोरोनाचे ५०६ नवे रुग्ण सापडल्याने चिंता व्यक्त केली जातेय. त्यातच मनसे अध्यक्ष राज ठाकरेंना पुन्हा एकदा कोरोनाची लागण झाल्याची माहिती समोर आली आहे. मागील काही काळापासून पायाच्या आजाराने त्रस्त असल्यामुळे ते मंगळवारी मुंबईतील लीलावती रुग्णालयात दाखल झाले होते आणि आज त्यांच्यावर शस्त्रक्रिया करण्यात येणार होती. मात्र पुन्हा एकदा त्यांना कोरोनाची लागण झाल्याने ही शस्त्रक्रिया पुढे ढकलण्यात आली आहे. राज ठाकरेंवर हिप बोनची शस्त्रक्रिया होणार आहे.

राज ठाकरेंची शस्त्रक्रिया पुढे ढकलली…

शस्त्रक्रिया करण्यापूर्वी २४ तास आधी काही वैद्यकीय चाचण्या करण्यात येणार असल्याने राज ठाकरे मंगळवारी लीलावती रुग्णालयात दाखल झाले.
याच चाचण्यांदरम्यान आधी कोविड डेड सेलमुळे राज ठाकरेंना वैद्यकीय भूल (अ‍ॅनेस्थेशिया) देऊ शकत नसल्यामुळे लिलावती रुग्णालयातील डॉक्टरांनी राज ठाकरेंची शस्त्रक्रिया पुढे ढकलण्याचा निर्णय घेतल्याचं सांगण्यात आलेले मात्र नंतर त्यांना कोरोनाची लागण झाल्याचे स्पष्ट झाले आहे.
यामुळे आता त्यांची शस्त्रक्रिया पुढे ढकलण्यात आली.

राज ठाकरेंनी दिली होती शस्त्रक्रियेची माहिती…

पायाचं दुखणं वाढल्यामुळे आणि वेगवेगळ्या राजकीय घडामोडींच्या पार्श्वभूमीवर राज ठाकरेंनी आपला अयोध्या दौरा रद्द केला होता.
पुण्यातील सभेत बोलताना राज ठाकरेंनी आपल्या शस्त्रक्रिया बाबतही सविस्तर माहिती दिली होती.
राज ठाकरे यांनी म्हटलं होतं की, मी जेव्हा मागे पुण्यात आलो होतो, तेव्हाच मला पायाच्या दुखण्याचा त्रास सुरू झाला होता.
जेव्हा मी मुंबईत परतलो तेव्हा काही टेस्ट करण्यात आल्या होत्या.
या टेस्टनंतर डॉक्टरांनी मला मला हिप बोनचं ऑपरेशन करण्याचा सल्ला दिला.
एक जूनला हिप बोनची शस्त्रक्रिया करण्यात येणारे.
म्हणूनच मी मुद्दामहून तुम्हाला याबद्दल माहिती दिली.
तुम्हाला न सांगताच शस्त्रक्रिया करण्यासाठी गेलो तर पत्रकार काहीही सांगू शकतात.