पंतप्रधान मोदींना ८ वर्षांची चिमुरडी म्हणाली, “मी तुम्हाला टीव्हीवर पाहते, तुम्ही लोकसभा टीव्हीत नोकरी करता!”

मुक्तपीठ टीम

पंतप्रधान नरेंद्र मोदी यांना लहान मुलं खुप आवडतात. लहान मुलांबरोबरचे त्यांचे अनेक फोटो आहेत. पंतप्रधान मोदी अनेकवेळा लहान मुलांसोबत गप्पा मारताना दिसतात. अशीच एक आठ वर्षाची मुलगी पंतप्रधान मोदींच्या भेटीला आली आणि त्यांची ही भेट खूपच खळखळून हसवणारी ठरली. मध्य प्रदेशातील उज्जैनचे खासदार अनिल फिरोजिया बुधवारी आपल्या कुटुंबासह पंतप्रधानांची भेट घेण्यासाठी संसदेत पोहोचले. त्यावेळी त्यांची मुलगी अहाना फिरोजिया हिनं मोदींशी गप्पा मारल्या.

आज मेरी दोनों बालिकाएं छोटी बालिका अहाना और बड़ी बालिका प्रियांशी आदरणीय प्रधानमंत्री जी से प्रत्यक्ष मिल कर और उनका स्नेह पाकर बहुत आनंदित और अभीभूत है।@narendramodi @PMOIndia @BJP4India @BJP4MP pic.twitter.com/v5ULVP9KPU

— Anil Firojiya (@bjpanilfirojiya) July 27, 2022

पंतप्रधान मोदी यांनी अहानाला विचारले की, मला ओळखतेस का, मी कोण आहे? माहित आहे का? त्यावेळी अहानाने तुम्ही मोदीजी आहात, मी तुम्हाला ओळखते. तुम्हाला मी टीव्हीवर बघते आणि तुम्ही लोकसभा टीव्हीत नोकरी करता, असं निरागसपणे उत्तर दिले. यावेळी उपस्थित असलेल्या सर्वांना अहानाच्या उत्तराने खळखळून हसायला आले, इतकंच नाही तर पंतप्रधान मोदी सुद्धा हसू लागले.

पंतप्रधान मोदी यांनी मुलीला रिकाम्या हाती परत जाऊ दिले नाही आणि त्यांनी तिला चॉकलेट दिले. त्याचवेळी, पंतप्रधान मोदींनी अनिल फिरोजिया यांचे वजन कमी केल्याबद्दल कौतुक केले, परंतु त्यांना आता आणखी वजन कमी करण्याची गरज असल्याचे सांगितले. यापूर्वीही अशा अनेक रंजक घटना घडल्या आहेत, ज्यात पंतप्रधान नरेंद्र मोदी मुलांसोबत हलके-फुलके क्षण घालवताना दिसले.