नवी मुंबईत प्रकल्पबाधितांच्या संस्थांना महिला मंडळांसाठी सिडकोचे चार भूखंड उपलब्ध

मुक्तपीठ टीम

सिडको महामंडळाकडून नवी मुंबई प्रकल्पबाधितांच्या नोंदणीकृत संस्थांस महिला मंडळाकरिता नवी मुंबईतील 4 भूखंड विक्रीकरिता उपलब्ध करून देण्यात आले आहेत. या योजनेतील एकूण 4 भूखंडांपैकी 2 भूखंड हे नेरूळ नोडमध्ये तर उर्वरित 2 भूखंड हे अनुक्रमे उलवे आणि 1 भूखंड द्रोणागिरी नोडमध्ये उपलब्ध आहेत.

सिडकोचे उपाध्यक्ष तथा व्यवस्थापकीय संचालक डॉ. संजय मुखर्जी यांनी दिलेल्या माहितीनुसार, नवी मुंबई प्रकल्पबाधितांच्या सर्वांगीण विकासास सिडकोने नेहमीच प्राधान्य दिले आहे. या योजने अंतर्गत महिला मंडळांकरिता भूखंड उपलब्ध करून देण्यात आले आहेत. महिला मंडळांकडून चालविण्यात येणाऱ्या विविध उपक्रमांद्वारे प्रकल्पबाधित महिलांच्या सक्षमीकरणास मोठ्या प्रमाणावर हातभार लागणार आहे.

सिडको महामंडळाकडून नवी मुंबईच्या सर्वांगीण विकासाकरिता सातत्याने विकास प्रकल्पांबरोबरच सामाजिक उद्देशांकरिताही भूखंड भाडेपट्ट्याने उपलब्ध करून देण्यात येतात.

कुठे आहेत हे भूखंड?

• सदर योजने अंतर्गत सेक्टर-23 (दारावे), नेरूळ, सेक्टर-6 (सारसोळे), नेरूळ, सेक्टर-2, उलवे आणि सेक्टर-52, द्रोणागिरी नोडमधील प्रत्येकी
• एक याप्रमाणे एकूण 4 भूखंड हे नवी मुंबई प्रकल्पबाधितांच्या नोंदणीकृत संस्थांना महिला मंडळांकरिता उपलब्ध करून देण्यात आले आहेत.
• सदर भूखंड हे 72.38 चौ.मी. ते 199.61 चौ.मी. दरम्यानच्या क्षेत्रफळाचे आहेत.

महिला मंडळांनी भूखंड खरेदी कशी करायची?

• सदर योजनेच्या योजना पुस्तिका 20 सप्टेंबर 2021 ते 14 ऑक्टोबर 2021 या कालावधीत, कार्यालयीन कामकाजांच्या वेळेत व दिवशी व्यवस्थापक (पुनर्वसन) यांचे कार्यालय, सिडको लि., सीबीडी.
• बेलापूर रेल्वे स्थानक वाणिज्यिक संकुल, टॉवर क्र. 7, 7 वा मजला, नवी मुंबई – 400614 या ठिकाणी विक्रीकरिता उपलब्ध आहेत.