घराच्या छतावर सोलर बसवा, केंद्र सरकारच्या योजनेतून ४० टक्के अनुदान मिळवा!

मुक्तपीठ टीम

काळानुसार, माणसाचे राहणीमान बदलले. बदलत्या राहणीमानामुळे खर्च ही तितकाच वाढला. उन्हाळ्यात माणसाला एसीची किंवा कुलरची गरज पडू लागली तर, थंडीत गरम पाण्याने अंघोळ करण्यासाठी गीझरची गरज लागली. यामुळे वीज बिल वाढले. सवयी पोटी काही करूही शकत नाही, परंतु, बहुतांश लोक या सवयींमुळे त्रस्त झाले आहेत. या विद्युत उपकरणांव्यतिरिक्त, दररोज अनेक इलेक्ट्रॉनिक उपकरणांचा वापर करण्यात येतो, ज्यामुळे वीज मीटरचा वेग वाढतो. अशा परिस्थितीत, वीजेचा कमी वापर करता बचत कशी करता येईल हा प्रश्न पडतो. पण काळजी नको. सध्या जिकडे तिकडे सोलरचा वापर होतो. सोलरचा वापर हा उपयुक्त ठरतो. केंद्र सरकारही या योजनेला पाठिंबा देत काही लाभ देते.

सोलर म्हणजेच हरित ऊर्जेला चालना देण्यासाठी घराच्या छतावर सोलर पॅनल लावले तर, केंद्र सरकार अनुदान देत ​​आहे. केंद्र सरकारच्या सोलर रुफटॉप योजनेंतर्गत ४० टक्के अनुदान दिले जात आहे. मिळालेल्या माहितीनुसार, १ किलोवॅट सोलर पॅनल बसवण्यासाठी सुमारे ६० ते ६५ हजार रुपये खर्च येतो. सौर पॅनेल व्यतिरिक्त, वायरिंग, स्विचिंगसाठी एमसीबी इत्यादी इतर काही उपकरणे खरेदी करण्यासाठी काही इतर खर्चही असू शकतो.

सौरऊर्जेला चालना देण्यासाठी सौर रूफटॉप योजना!

• देशात सौरऊर्जेला चालना देण्यासाठी नवीन आणि नवीकरणीय ऊर्जा मंत्रालयाकडून सौर रूफटॉप योजना राबविली जात आहे. . डिस्कॉम्समध्ये समाविष्ट असलेल्या कोणत्याही विक्रेत्यांकडून कोणीही त्याच्या घराच्या छतावर सौर पॅनेल लावू शकतो.
• त्यानंतर अनुदानासाठी अर्ज करता येईल.
• या योजनेंतर्गत, जर डिस्कॉममध्ये सामील असलेल्या विक्रेत्याकडून सौर पॅनेल स्थापित केले तर ते ५ वर्षांसाठी रूफटॉप सोलरच्या देखभालीसाठी देखील जबाबदार असतील.

सोलर रूफटॉप योजनेसाठी अर्ज प्रक्रिया

• https://solarrooftop.gov.in/ या वेबसाइटवर क्लिक करा
• Apply for Solar Rooftop वर जा
• आणखी एक नवीन पृष्ठ उघडेल, येथे राज्यानुसार लिंक निवडा.
• यानंतर फॉर्म उघडेल, ज्यामध्ये सर्व तपशील भरा.
• सौर पॅनेल बसवल्यानंतर ३० दिवसांच्या आत डिस्कॉमद्वारे अनुदानाची रक्कम लाभार्थ्यांच्या खात्यात जमा केली जाते.

सबसिडीचा फायदा घेऊन घरपोच सोलर पॅनल बसवल्यास आपल्या गरजेनुसार सहज वीज निर्मिती करता येईल. यासाठी केंद्र सरकारकडून चांगले अनुदानही मिळेल. घराच्या गरजा पूर्ण करण्यासाठी सौर पॅनेलद्वारे वीजनिर्मिती करायची असेल, तर सर्वप्रथम घरात चालणाऱ्या विद्युत उपकरणांची यादी तयार करावी लागेल. किती युनिट विजेची गरज भासते यानुसार, सौर पॅनेल बसवता येतात.

सोलर रुफटॉप योजनेला ४० टक्के अनुदान!

• सोलर रूफटॉप योजनेंतर्गत, सौर पॅनेल बसविण्यावर ४० टक्के अनुदान दिले जाते.
• ३ किलोवॅटपर्यंतचे सोलर रुफटॉप पॅनल बसवल्यास केंद्र सरकार ४० टक्क्यांपर्यंत अनुदान देईल.
• दुसरीकडे, जर १० किलोवॅटपर्यंतचे सौर पॅनेल लावले तर २० टक्के अनुदान मिळेल.