सोशल मीडियाची पॉझिटिव्ह पॉवर, ‘घे भरारी’ फेसबुक ग्रुपचे महिला व्यावसायिकांसाठी प्रदर्शन

मुक्तपीठ टीम

सोशल मीडियाची मोठी पॉझिटिव्ह पॉवर अनेकदा दिसत असते. त्यांची सकारात्मक घडवण्याची शक्ती मोठीच आहे. पुण्यातील छोट्या व महिला व्यावसायिकांना व्यासपीठ देण्यासाठी ‘घे भरारी’ फेसबुक ग्रुपतर्फे आयोजित चार दिवसीय ‘घे भरारी’ प्रदर्शन असाच एक उपक्रम आहे. या २८ ते ३१ ऑक्टोबर २०२१ या कालावधीत हे प्रदर्शन डीपी रस्त्यावरील शुभारंभ लॉन्स येथे होत आहे. या प्रदर्शनाचे उद्घाटन भारतीय जनता पक्ष राष्ट्रीय महिला मोर्चाच्या उपाध्यक्षा माजी आमदार प्रा. डॉ. मेधा कुलकर्णी यांच्या हस्ते गुरुवारी दुपारी १२ वाजता होणार आहे. रोज सकाळी ११ ते रात्री ९ या वेळेत हे प्रदर्शन सर्वांसाठी विनामूल्य खुले राहणार आहे, अशी माहिती संयोजक नीलम उमराणी-एदलाबादकर व राहुल कुलकर्णी यांनी दिली आहे.

राहुल कुलकर्णी म्हणाले, “व्यावसायिकांनी व्यावसायिकांसाठी चालवलेले हे व्यासपीठ आहे. अतिशय वैशिष्ट्यपूर्ण आणि दर्जेदार उत्पादनाचे १५० पेक्षा जास्त स्टॉल आहेत. लहानांपासून मोठ्यापर्यंत सगळ्यांसाठीच विविध वस्तू, खाद्यपदार्थ आणि मनोरंजाची मेजवानी असणार आहे. राष्ट्रीय पारितोषिक विजेता ‘मावळा’ हा रोमांचक गेम आणि मावळ्यांबरोबर सेल्फी हेही या प्रदर्शनाचे आकर्षण आहे. दिवाळीच्या पार्श्वभूमीवर, कोरोनानंतर होत असलेले हे प्रदर्शन सर्वांना सुखावणारे आहे.”

“महाराष्ट्रभरातून चवदार खाद्यपदार्थ, गृहसजावटीच्या वस्तू, हस्तकला, रेडिमेड, कोकणी पदार्थ, डिझायनर ड्रेसेस, हर्बल प्रॉडक्ट्स, आयुर्वेदिक औषधे, अत्तरे, परफ्युम, हॅण्डमेड दागिने, पेपर फिंलिंग फ्रिज मॅग्नेट, ऍक्रॅलिक गिफ्ट आर्टिकल, फ्रीज बॅग, सुंगधी उदबत्त्या, लाईट वेट पर्स, चंदेरी कलमकारी साड्या, आकर्षक नक्षीकाम केलेल्या ओढण्या, वेगवेळ्या चवीची सरबते, नाचणी, तीळ, शेंगदाण्याचे लाडू, उपवास खाकरा, लहानांसाठी खेळणी असतील,” असे नीलम उमराणी-एदलाबादकर यांनी नमूद केले.