पाच महिन्यांच्या तीराला मिळणार इंजेक्शन; पंतप्रधान मोदींकडून कर माफ

मुक्तपीठ टीम

मृत्यूशी झुंज सुरू असलेल्या ५ महिन्यांच्या मुंबईतील तीराच्या उपचाराचा मार्ग मोकळा झाला आहे. अखेर अथक प्रयत्नानंतर तिच्या उपचारासाठी परदेशातून येणाऱ्या औषधासाठी जो कोट्यवधी रुपयांचा कर भरावा लागणार होता, तो कर माफ करण्यात आला आहे. हा निर्णय केंद्र सरकारने त्वरित घेतल्याबद्दल विधानसभेतील विरोधी पक्षनेते देवेंद्र फडणवीस यांनी यासाठी पंतप्रधान नरेंद्र मोदी यांचे आभार मानले आहेत.

तीरा कामत या चिमुकलीला जीन रिप्लेसमेंट उपचारांची नितांत गरज आहे. कामत कुटुंबियांना लोकसहभागातून १६ कोटी रुपयांची मदत मिळाली. पण त्यातही एक अडचण उभी राहिली. पुढील उपचारासाठी ‘झोलजेन्स्मा’ हे औषध अमेरिकेतून आयात करावे लागणार होते. मात्र हे औषध भारतात आणण्यासाठी जीएसटी, कस्टम करांसह सुमारे ६.५ कोटी रूपये आणखी खर्च येणार होता.

Sincere gratitude to Hon PM @narendramodi ji for your humanitarian and extremely sensitive approach towards exempting all the taxes (approx ₹6.5 crore) for importing the life saving drug for Mumbai’s 5 month old Teera Kamat!
I wish Teera a speedy recovery & healthy life! pic.twitter.com/wxT8PsnSx5

— Devendra Fadnavis (@Dev_Fadnavis) February 9, 2021

त्यामुळे पालकांनी त्यातून सूट मागण्यासाठी देवेंद्र फडणवीस यांच्याकडे पाठपुरावा केला. त्यामुळे या औषधावरील या सर्व करांतून सूट मागण्यासाठी देवेंद्र फडणवीस यांनी १ फेब्रुवारी रोजी पंतप्रधान नरेंद्र मोदी यांना पत्र पाठवून त्यासंबंधीची विनंती केली. पंतप्रधान नरेंद्र मोदी यांनी निर्देश देताच, तातडीने त्यावर कार्यवाही झाली आणि त्यानुसार, ९ फेब्रुवारीला या औषधीपुरता सर्व कर माफ करणारा आदेश वित्त विभागाने जारी केला.

मुंबईतील रुग्णालयात तीरा कामतवर उपचार सुरू आहेत. तीरा एसएमए टाइप १ आजाराशी झगडत आहे. तज्ज्ञांच्या मते या आजारामुळे मुलीचे आयुष्य केवळ १८ महिन्यांपर्यंत असू शकते. या चिमुकलीला वाचवण्यासाठी अमेरिकेतील हे इंजेक्शन अत्यंत महत्त्वाचं आहे. हे इंजेक्शन लवकरात लवकर उपलब्ध करून देणं गरजेचं आहे. त्यासाठी आता केंद्र सरकारकडून देखील कामत कुटुंबियांना मोठा दिलासा मिळाला आहे.