महाराष्ट्रात सीएनजी ६ रुपयांनी, तर घरातील पाइप गॅस ३.५० रुपयांनी स्वस्त!

मुक्तपीठ टीम

सीएनजीवर चालणाऱ्या टॅक्सी आणि रिक्षासारख्या सार्वजनिक वाहतुकीचा वापर करणाऱ्या सर्वसामान्य प्रवाशांना मोठा दिलासा देणारी बातमी आहे. सिटी गॅस युटिलिटी महानगर गॅसने गुरुवारी सीएनजीच्या किरकोळ किंमतीत प्रति किलो ६ रुपये आणि पाइप गॅसच्या किरकोळ किमतीत ३.५० रुपये प्रति एससीएमने कपात करण्याची घोषणा केली, हे दर शुक्रवारपासून लागू होतील.

गुरुवारी एका निवेदनात, एमजीएलने म्हटले आहे की, १ एप्रिलपासून राज्य सरकारने नैसर्गिक वायूवरील वॅट १३.५ टक्क्यांवरून ३ टक्क्यांपर्यंत कमी केल्यामुळे, एमजीएलने संपूर्ण लाभ ग्राहकांना देण्याचा निर्णय घेतला आहे. मुंबई आणि आसपासच्या सीएनजीच्या किरकोळ किमतीत प्रति किलो ६ ते ६० रुपये आणि घरगुती पाइप्ड नॅचरल गॅसच्या (पीएनजी) किमतीत ३.५० ते ३६ रुपये प्रति एससीएम कपात करण्यात आली आहे. एमजीएलच्या प्रवक्त्याने सांगितले की, कंपनी योग्य वेळी पुरवठा किमतींमध्ये झालेल्या प्रचंड वाढीच्या परिणामाचे मूल्यांकन करेल आणि त्यानुसार किरकोळ किमतींमध्ये सुधारणा करेल. आदल्या दिवशी, जागतिक ऊर्जा दरांमध्ये वाढ झाल्यामुळे केंद्राने १ एप्रिलपासून सहा महिन्यांसाठी देशांतर्गत उत्पादित नैसर्गिक वायूच्या किमती दुप्पट केल्या होत्या आणि या निर्णयाचा फायदा रिलायन्स, ओएनजीसी आणि ऑइल इंडियाला होईल.

पेट्रोल, डिझेलच्या दरात ८० पैशांनी वाढ!

• सरकारी मालकीच्या तेल कंपन्यांनी गुरुवारी पेट्रोल आणि डिझेलच्या किरकोळ दरात प्रति लिटर ८०-८० पैशांनी वाढ केली आहे.
• ही दोन्ही उत्पादने गेल्या दहा दिवसांत नऊ दिवस महागली.
• या दरम्यान पेट्रोलच्या दरात प्रतिलिटर ६.४० रुपये आणि डिझेलमध्ये ५.४० रुपयांची वाढ करण्यात आली आहे.
• दिल्लीबद्दल बोलायचे झाले तर, येथे पेट्रोलची किरकोळ किंमत प्रति लीटर १०१.८१ रुपये झाली आहे.
• डिझेलची किंमत ८७.६७ रुपये प्रति लीटर आहे.
• महाराष्ट्र आणि राजस्थान ही दोन राज्ये आहेत जिथे डिझेलचा दर आता १०० रुपयांच्या पुढे गेला आहे.
• गुरुवारी पेट्रोलियम दरवाढीवरून विरोधी पक्षांनी संसदेच्या आत आणि बाहेर सरकारवर हल्लाबोल केला.