शिवसेना आज भाजपला मोठा धक्का देणार आहे. सध्या भाजपमध्ये असलेले नाशिकचे दोन मोठे नेते पुन्हा शिवसेनेत प्रवेश करणार आहेत. वसंत गिते आणि सुनील बागुल या नेत्यांनी काल शिवसेना खासदार संजय राऊत यांची भेट घेतली. या भेटीनंतर ते शिवसेनेत प्रवेश करणार हे निश्चित झाले आहे. यामुळे नाशिकमध्ये शिवसेनेची ताकद वाढणार आहे. तसेच आज पत्रकार परिषद घेऊन सायंकाळी ६ वाजता वर्षा बंगल्यावर गिते आणि बागुल मुख्यमंत्र्यांच्या उपस्थितीत हाती शिवबंधन बांधणार आहेत.
वसंत गीते हे नाशिकमधील शिवसेनेचे पहिले महापौर होते. तर बागूल हे जिल्हा प्रमुख होते. मात्र, सध्या भाजपामध्ये त्यांच्याकडे दुर्लक्ष होत असल्याची त्यांची तक्रार आहे. त्यामुळे त्यांनी पक्षातून बाहेर पडण्याचा निर्णय घेतल्याची चर्चा आहे. दोन दिवसांपूर्वी या नेत्यांनी मुंबईत मुख्यमंत्री उद्धव ठाकरे यांची भेट घेतली होती.
गिते आणि बागूल यांच्याकडे मागील कार्यकारिणीत प्रदेश उपाध्यक्षपद होते. परंतु, नव्या कार्यकारिणीत दोघांना पदावरून हटवण्यात येऊन पक्षात आमदार प्रा. देवयानी फरांदे यांचे राजकीय वजन वाढविण्यात आले. त्यामुळे ते नाराज होते. अलीकडेच गिते यांनी सर्वपक्षीय समर्थकांना ‘मिसळ पार्टी’ देऊन जोरदार शक्तिप्रदर्शन केले होते. तेव्हाच ते वेगळा निर्णय घेणार असल्याची चर्चा सुरू झाली होती.
राज्याचे विरोधी पक्ष नेते देवेंद्र फडणवीस तीन दिवस नाशिकच्या दौऱ्यावर जाणार आहेत. त्यांच्या या नियोजित दौऱ्यापूर्वी शिवसेना आज भाजपला धक्का देणार आहेत. या दोन्ही नेत्याच्या पक्षांतरानंतर नाशिकमधील स्थानिक राजकीय समीकरणात बदल होणार असून भाजपला फटका बसण्याची शक्यता आहे.
Subscribe
