विधानसभा अध्यक्षपदी भाजपाच्या राहुल नार्वेकरांचा विजय! एकप्रकारे मुख्यमंत्री एकनाथ शिंदेंकडे १६४ आमदारांचे पाठबळ सिद्ध!!

मुक्तपीठ टीम

महाराष्ट्र विधानसभेच्या अध्यक्षपदी भाजपाचे उमेदवार अॅड. राहुल नार्वेकर यांची निवड झाली. दक्षिण मुंबईतील कुलाबा मतदार संघाचे आमदार नार्वेकर यांना १६४ मते मिळाली. नार्वेकर यांना मुख्यमंत्री एकनाथ शिंदे यांच्या गटातील आमदारांसह त्यांच्या समर्थक अपक्ष आणि छोट्या पक्षातील आमदारांचीही साथ होती.

एकप्रकारे मुख्यमंत्री एकनाथ शिंदेंचं बहुमत सिद्ध!

सध्या महाराष्ट्राच्या विधानसभेत २८७ सदस्य आहेत. त्यामुळे बहुमतासाठी १४४ सदस्यांचे समर्थन आवश्यक आहे. विधानसभा अध्यक्षपदाच्या निवडणुकीत खुले मतदान झाले. त्यात भाजपा- शिवेसना शिंदे गटाच्या राहुल नार्वेकरांना बहुमतापेक्षा अधिक १६४ मते मिळाली. ही मते बहुमतापेक्षा २० जास्त आहेत. त्यामुळे एकप्रकारे विधानसभा अध्यक्षपदाच्या निवडणुकीतच मुख्यमंत्री एकनाथ शिंदे यांच्यामागे १६४ म्हणजे बहुमतापेक्षा जास्त आमदारांचे पाठबळ असल्याचे सिद्ध झाले आहेत.

शिवसेना ते भाजपा व्हाया राष्ट्रवादी!

• राहुल नार्वेकर हे मुंबईतील कुलाबा मतदारसंघातील भाजपाचे विद्यमान आमदार आहेत.
• राहुल नार्वेकर यांचा जन्म दक्षिण मुंबईतील कुलाबा परिसरात झाला.
• त्यांनी कायद्याचे शिक्षण घेतले आहे.
• त्यांचा भाऊ मकरंद कुलाब्यातून नगरसेवक आहे.

नार्वेकर हे रामराजे नाईक-निंबाळकर यांचे जावई!

• महाराष्ट्र विधान परिषदेचे सभापती रामराजे नाईक-निंबाळकरांचे जावई आहेत.
• रामराजे नाईक-निंबाळकर हे राष्ट्रवादी काँग्रेसचे ज्येष्ठ नेतेही आहेत.

शिवसेनेच्या युवा सेनेचे प्रवक्ते!

• राहुल नार्वेकर हे सुरुवातीच्या काळात शिवसेनेच्या युवा सेनेचे प्रवक्ते होते.
• २०१४ मध्ये त्यांनी पक्ष सोडला आणि राष्ट्रवादीत प्रवेश केला.

राष्ट्रवादी काँग्रेसकडून लोकसभा लढले!

• राहुल नार्वेकर यांनी २०१४ ची लोकसभा निवडणूक मावळमधून लढवली होती.
• त्या निवडणुकीत त्यांचा शिवसेनेच्या श्रीरंग आप्पा बारणे यांच्याकडून पराभव झाला होता.

२०१९ मध्ये भाजपात प्रवेश

• २०१९ च्या महाराष्ट्र विधानसभा निवडणुकीपूर्वी नार्वेकर यांनी कुलाबा येथून भाजपामध्ये प्रवेश केला होता.
• कुलाब्यातून त्यांनी काँग्रेसचे भाई जगताप यांचा पराभव करून विधानसभा निवडणूक जिंकली.