फेब्रुवारीत दोन दिवस बँकांचा संप! कामगारांचे हक्क, बेरोजगारी, महागाईचे मुद्दे!

मुक्तपीठ टीम

शेतकरी आंदोलनानंतर आता बँक कर्मचारी, कामगार संघटनांनी केंद्र सरकारविरोधात एल्गार पुकारला आहे. सार्वजनिक बँकाच्या खासगीकरणाबाबत केंद्र सरकारने घेतलेल्या निर्णयाविरोधात कामगार संघटनांनी दोन दिवसांचा संप पुकारला आहे. युनायटेड फोरम ऑफ बँक युनियनने संपाची हाक दिली आहे. शेतकऱ्यांचा संयुक्त किसान मोर्चा त्यांना साथ देणार आहे.

केंद्रातील नरेंद्र मोदी सरकारवर दबाव आणण्यासाठी आणि कष्टकऱ्यांच्या अनेक मागण्या पूर्ण व्हाव्यात, यासाठी कामगार संघटनांनी अर्थसंकल्पीय अधिवेशनादरम्यान बँक संपाची घोषणा केली आहे. केंद्रीय कामगार संघटनांनी म्हटले आहे की २३ आणि २४ फेब्रुवारी २०२२ रोजी देशभरातील बँकांचे कामकाज थांबवले जाईल.

केंद्रीय कामगार संघटना तसेच प्रादेशिक संघटनांच्या संयुक्त मंचाने बँक संप पुकारला आहे. नोव्हेंबरमध्ये नवी दिल्ली येथे झालेल्या कामगार संघटनांच्या राष्ट्रीय अधिवेशनात बँक संपाचा अंतिम निर्णय घेण्यात आला.

कामगार संघटनांचे काय म्हणणे?

• कामगार संहिता आणि ईडीएस रद्द करण्याच्या सरकारच्या निर्णयाच्या निषेधार्थ त्यांनी बंदची हाक दिली आहे.
• युनायटेड किसान मोर्चा (SKM) च्या ६ कलमी मागण्यांचाही त्यांच्या अजेंड्यात समावेश आहे.
• आयकर न भरणाऱ्या अशा कुटुंबांना अन्न आणि आर्थिक मदत देण्यात यावी.
• अशा लोकांना दरमहा ७,५०० रुपयांची आर्थिक मदत देण्यात यावी. महात्मा गांधी ग्रामीण रोजगार हमी योजनेचा विस्तार करा.

खासगीकरणाला विरोध!

• कामगार संघटनांचे म्हणणे आहे की ते कोणत्याही सरकारी कंपनीच्या किंवा मालमत्तेच्या खासगीकरणाच्या विरोधात आहेत आणि त्यास विरोध करतील.
• इंधन दरातील कपात पुरेशी नसल्याचे कामगार संघटनांनी म्हटले आहे.
• पेट्रोल आणि डिझेलच्या दरात वाढ झाल्याने महागाई वाढली आहे.
• त्यामुळे सरकारने पेट्रोल आणि डिझेलचे दर कमी करण्यासाठी आणखी पावले उचलावीत.

महागाई कमी करण्यासाठी सरकारने ठोस पावले उचलावीत

• देशातील महागाई कमी करण्यासाठी सरकारने ठोस पावले उचलण्याची मागणी कामगार संघटनांनी केली आहे.
• यासोबतच कंत्राटी पद्धतीने नियुक्त केलेल्या कर्मचाऱ्यांना नियमित करावे, योजना कर्मचाऱ्यांना समान कामासाठी समान वेतन देण्याची मागणी करण्यात आली आहे.
• नॅशनल पेन्शन स्कीम (NPS) रद्द करून जुनी पेन्शन योजनाच पूर्ववत करावी अशी कामगार संघटनांची मागणी आहे.

संपात सहभागी संघटना

• INTUC, AITUC, HMS, CITU, AIUTUC, TUCC, SEWA, ACTU, LPF, UTUC आणि स्वतंत्र प्रादेशिक युनियन या संपात सहभागी होणार आहेत.
• बँकांच्या दोन दिवसीय देशव्यापी संपाला किसान संयुक्त मोर्चाने पाठिंबा दिल्याचे युनायटेड फोरम ऑफ बँक युनियन्सने म्हटले आहे.