'शिवसृष्टी'चा पहिला टप्पा सज्ज, केंद्रीय गृहमंत्री अमित शाह २० नोव्हेंबरला उद्घाटन करणार!

मुक्तपीठ टीम

केंद्रीय गृहमंत्री अमित शाह येत्या २० नोव्हेंबरला पुणे दौऱ्यावर येणार आहेत. यादरम्यान नर्‍हे आंबेगाव येथे छत्रपती शिवाजी महाराजांच्या जीवनावर आधारित ‘शिव सृष्टी’ या थीम पार्कच्या पहिल्या टप्प्याचे उद्घाटन त्यांच्या हस्ते होणार आहे. या प्रकल्पाची संकल्पना दिवंगत शिवशाहीर बाबासाहेब पुरंदरे यांची होती. या प्रकल्पाचं काम पुरदंरेंचं महाराजा शिवछत्रपती प्रतिष्ठान करत आहे.

उद्घाटनाला केंद्रीय गृहमंत्र्यांसह महत्वाचे नेते!

केंद्रीय गृहमंत्री अमित शाह यांच्या हस्ते २० नोव्हेंबरला ‘शिव सृष्टी’च्या पहिल्या टप्प्याचे उद्घाटन करण्यात येणार आहे.
महाराष्ट्राचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, खासदार उदयनराजे भोसले, पुण्याचे पालकमंत्री चंद्रकांत पाटील आणि महाराष्ट्राचे पर्यटन मंत्री मंगल प्रभात लोढा हेही उद्घाटन सोहळ्याला उपस्थित राहणार आहेत.

कसा आहे शिवसृष्टी प्रकल्प?

पुण्यातील नऱ्हे आंबेगाव येथे शिवसृष्टी प्रकल्प उभारण्यात आला आहे.
महाराजा शिवछत्रपती प्रतिष्ठानचे विश्वस्त जगदीश कदम यांनी या प्रकल्पाच्या उद्देशाची माहिती दिली.
जगदीश कदम म्हणाले की, छत्रपती शिवाजी महाराजांच्या जीवनाची जाणीव करून देणे हा आमचा उद्देश आहे.
हा प्रकल्प आशियातील सर्वात ऐतिहासिक थीम पार्क प्रकल्प आहे.
प्रकल्पाच्या पहिल्या टप्प्याचा महत्त्वाचा भाग असलेल्या सरकारवाडाचे लोकार्पण शाह करणार आहेत.
सरकारवाडा या ठिकाणी कामकाजाचे ठिकाण, संशोधन ग्रंथालय, प्रदर्शन आणि बहुपयोगी सभागृह उभारण्यात आले आहे.
शिवाय गड –किल्ल्यांची सफर, राज्याभिषेकाचा देखावा, महाराजांची आग्रा येथून झालेली सुटका हे प्रसंग थ्री डी तंत्रज्ञान वापरुन साकारण्यात आले आहेत.