मुक्तपीठ टीम
नांदेड जिल्ह्यातील लोहा तालुक्यातील शिवणी जामगा गावात जातीय हिंसाचाराची घटना घडली आहे. तेथील एका तरुणाला काहींनी जातीय शिवीगाळ करत मारहाण केली. मध्यस्थी करणाऱ्या दुसऱ्या तरुणावर कुऱ्हाडीने प्राणघातक हल्ला करण्यात आला. त्यामुळे गावात तणाव निर्माण झाला असून. दोन आरोपींना अटक झाली असली तरी सर्वच आरोपींना अटक करून गंभीर जखमी पीडितावर चांगला इलाज करण्याची मागणी करण्यात येत आहे.
शिवणी जामगा ता. लोहा येथील संदीप दुधमल नेहमी प्रमाणे शेतात काम करूण आपल्या दुचाकीवर घरी जात असतांना रस्त्यात बसवेश्वर बोंमनाळे व प्रल्हाद जामगे यांनी संदीप दुधमल यांच्या दुचाकीला धडक मारुन संदीपशी वाद घातला. यावेळी त्या दोघांनी संदीपला जाती वाचक शिवीगाळ करून मारहाण केली.
एवढ्यावर न थांबता प्रल्हाद आणि विश्वनाथ जामगे, यादोजी जामगे, आप्पाराव जामगे, काशिनाथ जामगे, ज्ञानोबा जामगे दशरथ जामगे, सुदाम जामगे यांनी संदीप दुधमलच्या घरी जाऊन त्याच्या आई-वडील,चुलता-चुलती, भाऊ-बहीण यांना घरात घुसून मारहाण केली. ही मारहाण सुरू असताना हे भांडण सोडवायला गेलेल्या गणेश एडके यांना डोक्यामध्ये कुऱ्हाडीचा घाव घालून खाली पाडण्यात आले. त्यात ते गंभीर जखमी झाले आहेत. घटनेनंतर गावात तणाव पसरला आहे. पोलिसांनी नऊ जणांवर गुन्हा दाखल केला असून दोघांना अटक करण्यात आली आहे.
हाणामारीचा व्हीडिओ व्हायरल
हाणामारीचा व्हीडिओ सध्या सोशल मीडियावर व्हायरल झालाय. या प्रकरणी गुन्हा दाखल करण्याची प्रकिया सुरू आहे. या घटनेमुळे शिवणी जामगा शिवारात प्रचंड तणाव असून पोलिसांनी बंदोबस्त वाढवलाय.
पँथर सेनेची मागणी
ऑल इंडिया पँथर सेनेने या घटनेचा निषेध केला आहे. बौद्ध बांधव या राज्यात सुरक्षित नाही, असा आरोप करून तात्काळ सर्व आरोपींना अटक करण्याची मागणी केली आहे. तसेच जखमी पीडित गणेश एडकेंवर चांगल्या दवाखान्यात इलाजाची मागणीही केली आहे.
Subscribe
