मुक्तपीठ टीम
मुंबई उच्च न्यायालयाने एका ऐतिहासिक निकालात असा आदेश दिला आहे की, कोणत्याही आईला करिअर आणि मूल यापैकी निवडण्याची सक्ती करता येणार नाही. करिअर, मूल किंवा हे दोन्ही निवडण्याचा निर्णय हा तिच्यावर अवलंबून असेल. यासोबतच संबंधित प्रकरणात उच्च न्यायालयाने करिअरसाठी महिलेला मुलाला तिच्यासोबत परदेशात नेण्याची परवानगी दिली आहे.
हे प्रकरण पुण्यातील एका कंपनीत काम करणाऱ्या महिलेशी संबंधित आहे. कंपनीने महिलेला पोलंडमध्ये वरिष्ठ पदाची ऑफर दिली. यानंतर पतीने आपल्या लहान मुलीला परदेशात सोबत नेण्यास आक्षेप घेतला. यानंतर महिलेने मुंबई उच्च न्यायालयात धाव घेतली होती. या महिलेच्या याचिकेवर सुनावणी करताना मुंबई उच्च न्यायालयाने हा निकाल दिला आहे.
या याचिकेवर मुंबई उच्च न्यायालयाच्या न्यायमूर्ती भारती डांगरे यांच्यासमोर सुनावणी झाली. याचिकेत महिलेने आपल्या नऊ वर्षांच्या मुलीसह पोलंडला जाण्याची परवानगी मागितली होती. महिलेच्या पतीने या याचिकेला विरोध केला होता आणि दावा केला होता की, जर मुलीला त्याच्यापासून दूर नेले गेले तर तो तिला पुन्हा पाहू शकणार नाही. महिलेचा पोलंडमध्ये स्थायिक होण्याचा एकमेव हेतू पिता-मुलीतील बंध तोडणे हाच असल्याचा आरोप पतीने केला आहे.
उच्च न्यायालयाने आदेश देत म्हटलं आहे की, मुलीला वडिलांना भेटण्यासाठी थांबवले जाणार नाही, हे स्पष्ट केले. सुट्ट्यांमध्ये महिलेला तिच्या मुलीसोबत भारतात येण्याचे निर्देशही न्यायालयाने दिले आहेत. जेणेकरून वडील आपल्या मुलीला भेटू शकतील. पतीने उच्च न्यायालयात असेही सांगितले की तो आणि त्याचे कुटुंब भारतात मुलीची काळजी घेतील, परंतु हे नाकारण्यात आले.
Subscribe
