मुक्तपीठ टीम
उत्तर प्रदेशमध्ये महिलांच्या असुरक्षिततेच्या अनेक घटना समोर येतात. आता उत्तर प्रदेशचे मुख्यमंत्री योगी आदित्यनाथ यांनी महिलांच्या सुरक्षेसंबंधित एक मोठा निर्णय घेतला आहे. योगी आदित्यनाथ सरकारने नोकरदार महिलांबाबत मोठा निर्णय घेतला आहे. कोणत्याही महिला कर्मचाऱ्यांना त्यांच्या लेखी संमतीशिवाय सकाळी ६ वाजण्यापूर्वी आणि संध्याकाळी ७ नंतर काम करण्यास भाग पाडले जाऊ शकणार नाही, असे सरकारी आदेशात नमूद करण्यात आले आहे. या आदेशात योगी सरकारने असेही म्हटले आहे की, जर एखाद्या महिला कर्मचाऱ्याला विशेष परिस्थितीत थांबवले असेल तर त्यासाठी लेखी परवानगी घ्यावी लागेल. याशिवाय महिलांना कंपनीकडून मोफत वाहने द्यावी लागणार आहेत.
ज्या कंपन्यांमध्ये महिला काम करत आहेत, त्यांनाही महिलांसाठी अतिरिक्त व्यवस्था करावी लागेल, असा आदेश योगी सरकारने दिला आहे. योगी सरकारने महिलांच्या सुरक्षेचा विचार करून हा मोठा निर्णय घेतला आहे, असा दावा केला जात आहे. उत्तर प्रदेशचे अतिरिक्त मुख्य सचिव कामगार सुरेश चंद्र यांनी हा आदेश जारी केला आहे. योगी सरकारच्या या निर्णयानंतर आता उत्तर प्रदेशातील कोणत्याही महिलेला रात्रीच्या शिफ्टमध्ये कामावर बोलावता येणार नाही आणि रात्री उशिरापर्यंत ड्युटी करावी लागणार नाही.
योगी सरकारचा आदेश काय सांगतो?
महिला कर्मचाऱ्यांच्या लेखी संमतीनंतरच त्यांना संध्याकाळी ७ नंतर किंवा सकाळी ६ आधी कार्यालयात बोलावले जाऊ शकते. सरकारच्या या मार्गदर्शक सूचनांनंतरही काम करायचे की नाही हे कंपनीच्या गरजेवर नव्हे तर महिला कर्मचाऱ्यांवर अवलंबून असेल. त्याचबरोबर शासनाच्या मार्गदर्शक सूचनांचे पालन न केल्यास संस्थांवर कारवाई करण्यात येईल.
Subscribe
