भारतरत्न लता मंगेशकर यांना शासकीय इतमामात अखेरचा निरोप!

मुक्तपीठ टीम

नाम गुम जायेगा, चेहरा ये बदल जायेगा, मेरी आवाज़ ही, पहचान है, गर याद रहे, या संगीतमय धूनीच्या स्वरमय वातावरणात स्वरसम्राज्ञी भारतरत्न लता मंगेशकर यांना अखेरचा निरोप देण्यात आला. दादर येथील छत्रपती शिवाजी महाराज मैदान येथे स्वरसम्राज्ञी भारतरत्न लता मंगेशकर यांच्या पार्थिवाला शासकीय व लष्करी इतमामात, मंत्रोच्चारात अग्नि देऊन अंत्यसंस्कार करण्यात आले. बंदुकीच्या फैरींची सलामी देऊन जवानांनी यावेळी मानवंदना दिली.

यावेळी राष्ट्रपती रामनाथ कोविंद यांच्या वतीने वरिष्ठ लष्करी अधिकाऱ्यांनी पुष्पचक्र अर्पण केले. प्रधानमंत्री नरेंद्र मोदी, राज्यपाल भगतसिंह कोश्यारी, मुख्यमंत्री उद्धव ठाकरे,रश्मी ठाकरे, ज्येष्ठ नेते शरद पवार, गोव्याचे मुख्यमंत्री प्रमोद सावंत, उपमुख्यमंत्री अजित पवार, केंद्रीय उद्योग व वाणिज्य मंत्री पियूष गोयल, राज्याचे उद्योग मंत्री सुभाष देसाई, अन्न नागरी पुरवठा व ग्राहक संरक्षण मंत्री छगन भुजबळ, गृहमंत्री दिलीप वळसे-पाटील, पर्यावरण मंत्री आदित्य ठाकरे, विरोधी पक्ष नेते देवेंद्र फडणवीस, खासदार सुप्रिया सुळे, खासदार अनिल देसाई, मनसे अध्यक्ष राज ठाकरे,आमदार सुनील प्रभू,मुंबईच्या महापौर किशोरी पेडणेकर,मिलिंद नार्वेकर, महापालिका आयुक्त इकबाल सिंह-चहल, तसेच लता मंगेशकर यांच्या कुटुंबातील ज्येष्ठ संगीतकार हृदयनाथ मंगेशकर, ज्येष्ठ गायिका आशा भोसले, उषा मंगेशकर,भारतरत्न सचिन तेंडुलकर, लेखक-गीतकार जावेद अख्तर, गायिका अनुराधा पौडवाल, अभिनेता शाहरुख खान,अमीर खान, रणबीर कपूर,गायक शंकर महादेवन, चित्रपट क्षेत्रातील मान्यवर, भारतरत्न लता मंगेशकर यांचे असंख्य चाहते, चित्रपट क्षेत्रातील अनेक दिग्गज उपस्थितांनी आदरांजली वाहिली.

त्यांच्या राहत्या घरी प्रभुकुंज येथून दादर येथील छत्रपती शिवाजी महाराज मैदान पर्यंत फुलांनी सजलेल्या वाहनातून अंत्ययात्रा काढण्यात आली होती. या अंत्ययात्रेसोबत त्यांचे निकटवर्तीय होते. भारतरत्न लता मंगेशकर यांचे असंख्य चाहते उपस्थित होते, यावेळी अनेकांना लतादीदींना निरोप देताना अश्रू अनावर झाले होते.

पंतप्रधान नरेंद्र मोदी यांनी लता मंगेशकर यांच्या पार्थिवावर पुष्पचक्र अर्पण केले

पंतप्रधान नरेंद्र मोदी यांनी दिवंगत ज्येष्ठ पार्श्वगायिका भारतरत्न लता मंगेशकर यांच्या पार्थिवावर पुष्पचक्र अर्पण करून त्यांना आपली भावपूर्ण श्रद्धांजली वाहिली . राज्यपाल भगतसिंह कोश्यारी यांनी देखील लता मंगेशकर यांच्या पार्थिवावर पुष्पचक्र अर्पण करुन आपली श्रद्धांजली वाहिली.

मुख्यमंत्र्यांच्या आदेशानुसार वेळ कमी असतानाही शिवाजी पार्कात व्यवस्था

मुख्यमंत्री उद्धव ठाकरे यांनी स्वत: राज्य सरकारची यंत्रणा आणि मुंबई मनपाला लता मंगेशकरांच्या अखेरचा निरोप देण्यासाठी खास सोय करण्याचे आदेश दिले. त्यानुसार शिवसेनेचे माहिम मतदारसंघातील स्थानिक आमदार सदा सरवणकर हे शिवाजी पार्कमध्ये वेळेत सर्व उभारलं जावं यासाठी देखरेख करत होते. पर्यटनमंत्री आदित्य ठाकरे यांनीही शिवाजी पार्कवरील तयारीचा आढावा घेतला. वरिष्ठ पोलीस अधिकारी विश्वास नांगरे पाटील हेही तेथे बंदोबस्ताच्या व्यवस्थेवर खास लक्ष दिले. त्यामुळे वेळ कमी असूनही भारतरत्न गानसम्राज्ञी लता मंगेशकरांना योग्य प्रकारे अखेरचा निरोप देता आला.

पाहा व्हिडीओ: