“परमबीर सिंहांसाठी सचिन वाझे घेत होते लाच!”

मुक्तपीठ टीम

खंडणीप्रकरणी दाखल करण्यात आलेल्या आरोपपत्रात निलंबित पोलीस अधिकारी सचिन वाझे यांनी मुंबईचे माजी पोलीस आयुक्त परमबीर सिंह यांच्यासाठी पैसे गोळा केल्याचा दावा करण्यात आला आहे. मुंबई पोलिसांनी खंडणीच्या एका प्रकरणात आरोपपत्रात हा दावा केला आहे. सचिन वाझे यांच्या म्हणण्यानुसार, वसुलीच्या रकमेपैकी ७५ टक्के रक्कम परमबीर सिंह यांच्याकडे गेली आणि उर्वरित रक्कम त्यांनी ठेवली, असा आरोप आहे.

मुंबई पोलिसांच्या गुन्हे शाखेने माजी पोलिस आयुक्त परमबीर सिंह आणि अन्य तिघांविरुद्ध गोरेगाव उपनगरात दाखल झालेल्या खंडणीप्रकरणी आरोपपत्र दाखल केले. ४०० हून अधिक पानांचे आरोपपत्र मुख्य महानगर दंडाधिकारी एस.बी. भाजीपाले यांच्यासमोर दाखल केले होते. वरिष्ठ आयपीएस अधिकारी परमबीर सिंह यांच्यावर दाखल झालेले हे पहिले आरोपपत्र आहे तर, महाराष्ट्रातील खंडणीच्या किमान ५ प्रकरणांमध्ये त्यांचे नाव आहे. परमबीर सिंह यांना या आठवड्याच्या सुरुवातीला निलंबित करण्यात आले होते. आरोपींपैकी सुमित सिंह आणि अल्पेश पटेल जामिनावर बाहेर आहेत. तर, विनायक सिंह आणि रियाझ भाटी हे वॉन्टेड आरोपी आहेत.

आरोपपत्रानुसार, तीन ते चार साक्षीदारांनी पुष्टी केली की वाझे परमबीर सिंह यांना “नंबर वन” म्हणून फोन करत होते आणि नंबर वनने पैसे मागितले आहे असे सांगितले जात होते. ते थेट शहर पोलीस प्रमुखांना भेटून महत्त्वाच्या विषयांवर चर्चा करायचे आणि यावरुन ते परमबीर सिंह यांच्या जवळचे असल्याचे दिसून येते. आरोपपत्रानुसार, सिंह आणि वाझे इतर आरोपींमार्फत क्रिकेट बुकी तसेच हॉटेल आणि बारमालकांकडून पैशांची मागणी करत होते आणि पैसे न दिल्यास त्यांना अटक करण्याची आणि त्यांच्या जागेवर छापे टाकण्याची धमकी द्यायचे.

हे प्रकरण बिमल अग्रवाल यांच्या तक्रारीशी संबंधित आहे. तक्रारीनुसार, रेस्टॉरंटमध्ये दोनदा छापा टाकला नाही म्हणून आरोपीने त्यांच्याकडून ९ लाख रुपये उकळले आणि त्याला स्वत:साठी २.९२ लाख रुपये किंमतीचे दोन स्मार्टफोन खरेदी करण्यास भाग पाडले. तक्रारदाराच्या म्हणण्यानुसार, तो भागीदारीत ही संस्था चालवत असे. ही घटना जानेवारी २०२० ते मार्च २०२१ दरम्यान घडल्याचे पोलिसांनी यापूर्वी सांगितले होते. यानंतर सहा आरोपींविरुद्ध भारतीय कलम ३८४, ३८५, ३४ अन्वये गुन्हा दाखल करण्यात आला.