उपोषण करणारे शेतकरी नेते रविकांत तुपकरांचे उपोषण स्थगित! प्रकृती खालावल्यानंतर सरकार धावले!

मुक्तपीठ टीम

सोयाबीन आणि कापूस उत्पादक शेतकऱ्यांच्या मागणीसाठी गेले चार दिवस स्वाभिमानी शेतकरी संघटनेचे नेते रविकांत तुपकर यांनी अन्नत्याग आंदोलन पुकारले आहे. हे आंदोलन तुपकर यांनी आपल्या राहत्या घरीच पुकारले आहे. या आंदोलनामध्ये गेल्या तीन दिवसांपासून त्यांनी अन्नाचा एक कणही घेतला नसल्याने त्यांची प्रकृती खालावली आहे. माझ्या मुलाला काही झाल्यास त्याला सरकार जबाबदार असेल असा इशारा तुपकर यांच्या आईने दिला, त्यानंतर अखेर राज्यातील आघाडी सरकारचे मन द्रवले. बुलडाण्याचे पालकमंत्री राजेंद्र शिंगणे यांनी उपोषणस्थळी धाव घेऊन स्वाभिमानी शेतकरी संघटनेच्या मागण्यांवर सरकार विचार करेल. त्याासाठी उपमुख्यमंत्री अजित पवार यांच्याशी बैठक आयोजित करण्याचे आश्वासन दिले. त्यानंतर तुपकरांनी त्यांच्या उपस्थितीत उपोषण स्थगित केले.

दि.20 नोव्हें.2021 गावबंद आंदोलनासंदर्भात आवाहन… pic.twitter.com/2XMU3Khn6t

— Ravikant Tupkar (@Ravikanttupkar1) November 19, 2021

तुपकर यांच्या आईचा राज्य सरकारला इशारा

• रविकांत तुपकर यांच्या उपोषणाचा चौथा दिवस होता.
• त्यांनी चार दिवसांमध्ये अन्नाचा एक कणही घेतलेला नाही.
• त्यामुळे त्यांची प्रकृती खालावली.
• मात्र अदयापही राज्य सरकारकडून त्यांच्या या आंदोलनाची दखल घेण्यात आली नाही.
• जीव गेला तरी चालेल पण शेतकऱ्यांना न्याय मिळेपर्यंत आंदोलन मागे घेणार नसल्याची भूमिका तुपकर यांनी घेतली आहे.
• आंदोलनाच्या तिसऱ्या दिवशी तुपकर यांच्या आईने आंदोलनस्थळी येऊन, आपल्या मुलाची भेट घेतली.
• तुपकर यांची अवस्था पाहून आईला आश्रू अनावर झाले, त्यांनी अक्षरशः हंबरडा फोडला.
• माझ्या मुलाच्या आंदोलनाची तातडीने सरकारने दखल घ्यावी, अन्यथा माझ्या मुलाचे काही बरे वाईट झाल्यास त्याची जबाबदारी ही सरकारची असेल असा इशारा तुपकर यांच्या आई गीताबाई तुपकर यांनी दिला आहे.
• त्यानंतर सरकारला जाग आली. पालकमंत्री राजेंद्र शिंगणे यांनी रविकांत तुपकर यांची भेट घेतली.

शुक्रवारी आंदोलनस्थळी तणावाचे वातावरण

• दरम्यान शुक्रवारी रात्री या आंदोलनाला हिंसक वळण लागल्याचे पहायला मिळाले.
• स्वाभिमानी शेतकरी संघटनेचे कार्यकर्ते आणि पोलिसांमध्ये बाचाबाची झाली.
• परिस्थिती नियंत्रणाबाहेर जात असल्याचे पाहून पोलिसांनी आंदोलस्थळी लावण्यात आलेल्या बंदोबस्तामध्ये वाढ केली आहे.
• पोलीस आणि कार्यकर्ते आमने-सामने आल्याने काही काळ आंदोलनस्थळी तणावाचे वातावरण निर्माण झाले होते.

या आहेत मागण्या

• कापसाला १२ हजार रुपये आणि सोयाबीनला ८ हजार रुपये भाव मिळावा, अशी संघटनेची प्रमुख मागणी आहे.
• सरकारने सोयापेंड आयात केल्यामुळं सोयाबीनचे भाव कमी झाले आहेत.
• पाऊस आणि अतिवृष्टीनं उत्पादनही प्रभावित झाले आहे.
• त्यामुळे सोयाबीन आणि कापसाचे भाव वाढून शेतकऱ्यांना दिलासा द्यावा, शेतकऱ्यांना योग्य नुकसानभरपाई न देणाऱ्या पीकविमा कंपन्यांवर कारवाई करावी, वीजबिल थकलेल्या शेतकऱ्याचे वीज कनेक्शन कापू नये.