मुक्तपीठ टीम
महाराष्ट्रातील पालघर जिल्ह्यातील मुरब्यांचे मच्छिमार चंद्रकांत तरे आणि त्यांच्या सहकाऱ्यांना घोळ माशांमुळे मोठा फायदा झाला आहे. खोल समुद्रात मच्छिमारी करताना त्यांना जाळ्यात १५७ घोळ मासे सापडले. लिलावात ते मासे १ कोटी ३३ लाख रुपयांना विकले गेले. चंद्रकांत आणि त्यांचा मुलगा सोमनाथ ७ मच्छिमारांसह २० ते २५ नॉटिकल मैल समुद्रात वाधावनच्या दिशेने हरबा देवी नावाच्या बोटीने गेले होते. यावेळी १५७ घोळ मासे समुद्रात पसरलेल्या जाळ्यात सापडले. बोटीवरील लोकांमध्ये आनंदाची लाट उसळली, कारण या मच्छिमारीमुळे त्यांना प्रचंड फायदा झाला.
उत्तरेतील व्यापाऱ्यांकडून भोताला मागणी
- घोळ माशांचे वैज्ञानिक नाव ‘प्रोटोनिबीया डायकॅन्थस’ आहे. याला ‘सी गोल्ड’ असेही म्हणतात.
- नर घोळ माशातील भोताला व्यापाऱ्यांकडून मोठी मागणी असते.
- त्या तुलनेत मादी जातीच्या घोळ माशाच्या भोतला अगदीच नगण्य किंमत मिळते.
- उत्तर प्रदेश,बिहार येथून आलेल्या परप्रांतीय व्यापाऱ्यांकडून घोळ माशांच्या भोताची खरेदी केली जाते.
- लिलावाद्वारे घोळ माशाच्या भोताची खरेदी केली जाते.
- सर्वात जास्त बोली लावणारा आणि पैश्याची हमी देणाऱ्या व्यापाऱ्याची निवड विक्री दरम्यान केली जाते.
दुसऱ्या लिलावात चांगली किंमत
- सातपाटीमध्ये सर्व प्रथम शुक्रवारी भोताचा लिलाव एका व्यापाऱ्याच्या कमी किमतीच्या बोलीने अयशस्वी झाली.
- रविवारी मुरबे येथे १५ ते २० व्यापाऱ्यांच्या उपस्थितीत लिलाव पार पडला.
- तेथे एक कोटी २५ लाखाची उच्चतम बोली लागल्याची माहिती पुढे आली.
- तर घोळ माशाचे मास ३०० ते ३५० रुपये प्रतिकिलो दराने स्थानिक व्यापाऱ्यांनी खरेदी केल्याचे कळते.
भोताचा सौंदर्यापासून शस्त्रक्रियेपर्यंत उपयोगी
- भोत खरेदी केल्यानंतर खूपच नाजूकरीत्या ते स्वच्छ करण्याची प्रक्रिया केली जाते.
- खूपच लक्षपूर्वक प्रत्येक भोताची काळजी घेतली जाते.
- भोतामधील रक्तपेशी वेगळ्या करून एका बंद खोलीत मोठ्या काचेच्या बल्बच्या प्रकाशात सुकवल्या जातात.
- हॉंगकाँग, मलेशिया, थायलंड आदी देशात ह्या भोताला मोठी किंमत मिळते.
- सौंदर्यप्रसाधने, औषधे, शस्त्रक्रिया दरम्यान लागणारे वितळणारे धागे बनवणे आदी साठी ह्याचा वापर करण्यात येत असल्याचे सांगितले जाते.
Subscribe
