उद्योजकांवरील हल्ल्यांच्या दुष्परिणामांकडे फडणवीसांनी वेधले मुख्यमंत्र्यांचे लक्ष

मुक्तपीठ टीम

औरंगाबादमध्ये उद्योजकांवर सातत्याने होणाऱ्या हल्ल्यांकडे विरोधी पक्षनेते देवेंद्र फडणवीस यांनी मुख्यमंत्री उद्धव ठाकरे यांचे लक्ष वेधले आहे. फडणवीसांनी या प्रकरणी मुख्यमंत्र्यांना पत्र लिहिले आहे. औरंगाबादमध्ये सातत्याने उद्योजकांवर होत असलेले हल्ले गंभीर असून, महाराष्ट्राबाहेर जाणारे चित्र विपरीत आहे. याबाबत तातडीने दखल घेऊन कठोर कारवाई करावी आणि जलदगती न्यायालयात खटले चालवून आरोपींना शिक्षा व्हावी, अशी मागणी फडणवीस यांनी पत्राद्वारे मुख्यमंत्र्यांकडे केली आहे.

फडणवीसांचे पत्र जसं आहे तसं

महोदय,

उद्योगनगरी संभाजीनगरमध्ये सातत्याने उद्योजकांवर हल्ले होत असण्याच्या घटना अलिकडच्या काळात प्रकाशात आल्या आहेत. दि .८ ऑगस्ट रोजीभोगलेउद्योगसमूहाचेप्रबंध संचालक नित्यानंद भोगले, उत्पादन व्यवस्थापक श्री सोनगीरकर, कार्मिक व्यवस्थापक भूषण व्याहाळकर या तिघांना बाहेरून आलेल्या १५-२० कथित गुंडांनी मारहाण केली. यासंदर्भातील संपूर्ण फुटेज पोलिसांकडे उपलब्ध आहे. कोणत्याही प्रकारची चिथावणी नसताना ही मारहाण झाली आहे . या प्रकरणातील काही आरोपींना अटक झाली तर काही फरार आहेत.

दि. १० ऑगस्ट रोजी वाळुज एमआयडीसी परिसरात असलेल्या श्री गणेश कोटिंग समूहावर हल्ला करण्यात आला . लेबर कॉन्ट्रॅक्ट आम्हाला द्या, या मागणीसाठी हे लोक गेले होते. या दोन घटनानंतर आता इतरही अनेक छोट्या उद्योगांच्या समस्या पुढे येत आहेत. पेट्रोल भरून पेट्रोलचे पैसे न देणे, हॉटेलमध्ये जेवल्यावर त्याचे पैसे न देणे, वाहनांची दुरूस्ती केल्यावर त्याचे पैसेन देणे, अशा अनेक तक्रारी पुढे येत आहेत. विशेषत: अलिकडच्या ८-१० महिन्यात अशा तक्रारी वाढल्याचे स्थानिकांचे म्हणणे आहे. अशा प्रकरणात पोलिसांत तक्रारी झाल्यानंतर सामान्य कलमांन्वये कारवाई होते. परिणामी वर्षानुवर्षे न्यायालयात तक्रारी प्रलंबित राहतात आणि कितीतरी वर्षांनी शिक्षा सुनावली जाते.

उद्योगनगरी संभाजीनगरमध्ये सातत्याने उद्योजकांवर होत असलेले हल्ले, त्यातून महाराष्ट्राबाहेर जाणारे विपरित चित्र, यामुळे रोजगारांवर येणारी गदा, इत्यादींचा गांभीर्याने विचार करून याबाबत तातडीने पाऊले उचलण्याबाबत मा. मुख्यमंत्री उद्धव ठाकरेजी यांना पत्र..#Maharashtra pic.twitter.com/kzTV7PedIf

— Devendra Fadnavis (@Dev_Fadnavis) August 18, 2021

अशा घटना सातत्याने घडत राहिल्यास त्याचा राज्यात गुंतवणूक येण्याच्या प्रक्रियेवर प्रतिकूल परिणाम होतो, शिवाय एक वेगळे चित्रगुंतवणूकदारांच्या मनात उभे राहते. त्यामुळे महाराष्ट्रात अधिकाधिक गुंतवणूक यावी, यातून मोठ्या संख्येने रोजगारनिर्मिती व्हावी, यासाठी अशा घटनांकडे अतिशय गांभीयनि पाहण्याची गरज आहे. या सर्व घटनांमध्ये कठोरातील कठोर कलमे लावून, हे खटले जलदगती न्यायालयात चालवून आरोपींना कठोर शिक्षा होत नाही, तोवर या कथित गुंडांवर जरब बसणार नाही.

आपण स्वत: यात लक्ष घालून तातडीने कारवाई कराल, ही आशा करतो.

आपला,
देवेंद्र फडणवीस