“सरकारकडून लोकशाहीचा खून”

मुक्तपीठ टीम

लोकशाही प्रक्रियेनुसार विरोधी पक्षांच्या आमदारांनी विधानभवनाच्या परिसरात अभिरुप विधानसभा भरविली, त्यामध्ये विरोधी पक्षांच्या सदस्यांनी कोणत्याही नियमांचे उल्लंघन केले नाही, तरीही सरकारने हुकुमशाही करीत विधीमंडळाच्या मार्शलमार्फत आमचे माईक, स्पीकर काढून घेतले. तसेच विधानभवनाच्या सुरक्षा रक्षक अधिकाऱ्यांना निलंबित करण्याचे आदेश देणे ही सरकाराची मनमानी असून हा एका प्रकारे लोकशाहीचा खून आहे या शब्दात विधानपरिषदेचे विरोधी पक्ष नेते प्रविण दरेकर यांनी आपला धिक्कार नोंदविला.

विधानसभेचे तालिका अध्यक्ष भास्कर जाधव यांनी काल भाजपच्या १२ आमदारांना निलंबित केलं. त्यामुळे भाजप नेते आक्रमक झाले आहेत. भाजप व मित्र पक्षांच्या आमदारांनी थेट विधानभवनाच्या पायऱ्यांजवळील प्रवेशद्वावर अभिरुप विधानसभा आयोजित करत भाजपाच्या आमदारांचे चुकीच्या पध्दतीने निलंबित करण्याच्या निर्णयाचा निषेध नोंदविला. हा विषय विधानपरिषेदत उपस्थित झाल्यानंतर यासंदर्भात बोलताना दरेकर म्हणाले की, माजी मुख्यमंत्री व विधानसभेचे विरोधी पक्षनेते देवेंद्र फडणवीस यांच्यासारख्या नेत्यांना विधानभवनाच्या प्रवेशद्वारावर बसून अभिरुपी विधानसभा भरवावी लागते. तरीही या अभिरुपी विधानसभेच्या कामकाजावर सुरक्षा रक्षकांमार्फत कारवाई करण्याचे आदेश देण्यात येतात. हे दुदैर्वी आहे. फक्त विरोधकांची मुस्कटदाबी करण्याचा हा प्रकार असल्याची टीका दरेकर यांनी केली.

दरेकर यांनी सांगितले की, भाजपाच्या १२ सदस्यांच्या निलंबन प्रकरणाच्या चौकशीमध्ये सत्य नक्कीच बाहेर येईल. माइक आणि स्पीकर काढून घेऊन विरोधकांचा आवाज दाबता येणार नाही. विरोधी पक्षांचे सदस्य विधानसभा कामकाजात सहभागी होत नसतील तर कामकाज स्थगित करता येते. विधिमंडळाच्या कामकाजामध्ये विरोधी पक्ष उपस्थित नसेल तर त्या कामकाजाला महत्व नसते. कारण लोकशाहीमध्ये, संविधानामध्ये विरोधी पक्षालाही तितकेच महत्व आहे, असा टोलाही त्यांनी लगावाला.