जगभरात मंकीपॉक्सचा वाढता धोका, सरकारनं जारी केल्या मार्गदर्शक सूचना

मुक्तपीठ टीम

परदेशात मंकीपॉक्सचा संसर्ग वाढत आहे. मांकीपॉक्सचा वाढता धोका लक्षात घेता, भारतीय आरोग्य आणि कुटुंब कल्याण मंत्रालयाने मार्गदर्शक तत्त्वे जारी केली आहेत. आत्तापर्यंत भारतात या आजाराचे एकही रूग्ण समोर आलेले नाही. असे असतानाही खबरदारीच्या पातळीवर सरकारला दुर्लक्ष नको आहे. यामुळेच या आजाराबद्दल किंवा त्याच्या लक्षणांबद्दल कोणताही गैरसमज होऊ नये म्हणून मंत्रालयाने मार्गदर्शक तत्त्वे जारी केली आहेत.

मंकीपॉक्स संसर्गाची प्रयोगशाळेच्या चाचणीनंतरच पुष्टी केली जाईल

• एखादा रूग्ण आढळल्यास प्रयोगशाळेमध्ये चाचणी केल्यानंतरच मंकीपॉक्स या संसर्गाची पुष्टी करण्यात येणार.
• यासाठी केवळ पीसीआर किंवा डीएनए चाचणीची पद्धत वापरली जाणार आहे.
• संशयित प्रकरण आढळल्यास, त्याचा नमुना राज्ये आणि जिल्ह्यांमध्ये बनवलेल्या आयसीएमआर-एनआयव्हीच्या प्रयोगशाळेत पाठविला जाईल.
• मंकीपॉक्समुळे उद्भवलेल्या परिस्थितीला तोंड देण्यासाठी जारी केलेल्या मार्गदर्शक तत्त्वांनुसार, महामारीविज्ञान अंतर्गत सर्व व्यवस्था करणे आवश्यक आहे.

मंत्रालयाने जारी केलेल्या मार्गदर्शक तत्त्वांमध्ये काळजी आणि नवीन प्रकरणांची जलद ओळख यावरही भर देण्यात आला आहे. त्यात म्हटले आहे की, एका व्यक्तीकडून दुसऱ्या व्यक्तीकडे संसर्गाचा प्रसार थांबवावा लागेल. यासोबतच संसर्ग रोखण्याच्या आणि नियंत्रित करण्याच्या पद्धतीही तपशीलवार सांगितल्या आहेत. घरीच संसर्ग रोखणे आणि त्यावर नियंत्रण ठेवणे, किंवा रूग्णाला आयसोलेशनमध्ये ठेवणे आणि रुग्णवाहिकेत बदली करण्याच्या धोरणाबाबतही माहिती देण्यात आली आहे. यासोबतच आयसोलेशनमध्ये कोणती खबरदारी घ्यावी हे देखील सांगण्यात आले आहे.

मंकीपॉक्स लक्षणांबाबत खबरदारी

• मांकीपॉक्स संसर्गाने पीडित व्यक्तीच्या संपर्कात आल्यानंतर त्याच्या लक्षणांवर २१ दिवस सतत लक्ष ठेवले पाहिजे.
• याशिवाय अशा आजारी व्यक्तीची कोणतीही वस्तू वापरणे टाळावे, यासाठी लोकांना जागरूक करण्यावरही भर देण्यात आला आहे.
• तसेच, जर या आजाराने ग्रस्त व्यक्ती आयसोलेसनमध्ये असेल, तर त्याची काळजी घेताना हातांची स्वच्छता घ्यावी.
• याशिवाय, योग्य पीपीई किट घालण्याची गरज आहे.