"सोमय्या सांगाच...नारायण राणे, कृपाशंकर सिंह यांच्यावरील आरोपांचे काय झाले?"

मुक्तपीठ टीम

भाजपा नेते किरीट सोमय्या हे महाविकास आघाडीच्या नेत्यांवर सातत्याने भ्रष्टाचाराचे आरोप करत आहेत. या आरोपांवरून काँग्रेस प्रदेशाध्यक्ष नाना पटोले यांनी भाजपा आणि किरीट सोमय्यांवर जोरदार निशाणा साधला आहे. केंद्रीय मंत्री नारायण राणे आणि माजी गृहराज्यमंत्री कृपाशंकर सिंह यांच्यावरही सोमय्या यांनी भ्रष्टाचाराचे गंभीर आरोप केले होते, या आरोपाचे पुढे काय झाले? आता ते भाजपात गेले तर मग ते पवित्र झाले का ? असा खोचक प्रश्न त्यांनी केला आहे.

आरोप करणे, लोकांची बदनामी हा सोमय्याचा धंदा…

मुख्यमंत्री उद्धव ठाकरे यांचे मेव्हणे पाटणकर यांच्यावरील ईडीच्या कारवाईनंतर मुख्यमंत्र्यांनी राजीनामा द्यावा अशी मागणी भाजपा आमदार नितेश राणे यांनी केली होती.
त्यावर प्रतिक्रिया देताना नाना पटोले म्हणाले की, किरीट सोमय्या यांनी नारायण राणे व कृपाशंकर सिंह यांच्यावरही भ्रष्टाचाराचे गंभीर आरोप केले होते.
या आरोपाचे पुढे काय झाले? ज्यांच्यावर आरोप केले जातात ते भाजपात गेले की पवित्र होतात का?
किरीट सोमय्या यांनी आतापर्यंत केलेल्या आरोपातील किती आरोप सिद्ध झाले.
आरोप करणे व लोकांची बदनामी करणे हा किरीट सोमय्याचा धंदा आहे.

भाजपाचा आरोप-आरोपांचा खेळ लोकांच्या लक्षात आलाय!

देशात महागाई, बेरोजगारी, इंधन दरवाढ, शेतकरी, कामगार यांचे महत्वाचे प्रश्न आहेत, या महत्वाच्या मुद्द्यावरून लोकांचे लक्ष दुसरीकडे वळवण्यासाठी भाजपाकडून असे बेछूट आरोप करण्यात येत आहेत.
भाजपाचा हा आरोप-आरोपांचा खेळ लोकांच्या लक्षात आला आहे.
दररोज महाविकास आघाडींच्या नेत्यांवर भ्रष्टाचाराचे आरोप करून महाराष्ट्र भ्रष्टाचारी राज्य असल्याचे प्रतिमा करण्याचा भाजपाचा प्रयत्न आहे.
परंतु जनता भाजपाचा हा खेळ ओळखून आहे.